ചെറുപുഴ: കാങ്കോല്‍-ആലപ്പടമ്പ് പഞ്ചായത്തിലെ ചൂരലില്‍ ബിവറേജസ് കോര്‍പറേഷന്റെ ഔട്ട്‌ലറ്റ് തുറക്കാനുള്ള ശ്രമം നാട്ടുകാര്‍ തടഞ്ഞു. ഇന്നലെ രാത്രി ഏഴോടെ ചൂരല്‍ ടൗണില്‍ ഒരു ലോഡ് മദ്യം എത്തിച്ചിരുന്നു. ഉടന്‍ തന്നെ മദ്യവില്‍പന തുടങ്ങാനുള്ള നീക്കവും നടത്തി. സംഭവമറിഞ്ഞ് സ്ത്രീകള്‍ ഉള്‍പ്പെടെ നൂറ് കണക്കിനാളുകള്‍ സ്ഥലത്തെത്തി. യാതൊരു കാരണവശാലും മദ്യവില്‍പനശാല തുറക്കാന്‍ അനുവദിക്കില്ലെന്ന് പ്രതിഷേധക്കാര്‍ അറിയിച്ചു. പെരിങ്ങോം എസ്.ഐ എം.എന്‍ ബിജോയിയുടെ നേതൃത്വത്തില്‍ പൊലിസ് സ്ഥലത്തെത്തി. തുടര്‍ന്ന് സമരസമിതി നേതാക്കള്‍ അധികൃതരുമായി നടത്തിയ ചര്‍ച്ചയില്‍ ഇന്നു രാവിലെ പത്തോടെ മദ്യം തിരികെ കൊണ്ടുപോകുമെന്ന ഉറപ്പില്‍ ഔട്ട്‌ലറ്റിന് മുന്നിലെ ഉപരോധം അവസാനിപ്പിച്ചു.