റിയാദ്: ഏറെ സാഹസപ്പെട്ടാണെങ്കിലും തന്റെ വാത്സല്യ കൂട്ടായ പീനട്ടിനെയും കൂട്ടി ഇന്ത്യയിലേക്ക് യാത്ര തിരിക്കാന്‍ കഴിഞ്ഞതിന്റെ ത്രില്ലിലാണ് ഷെറിന്‍ ആഞ്ചലീന.

നാട്ടിലേക്ക് വിമാനത്തില്‍ വളര്‍ത്തു മൃഗത്തെ കൊണ്ടു പോകുന്നതിനുള്ള നിയമകുരുക്കിലെ നൂലാമാലകള്‍ ആഴിച്ചാണ് ഇവര്‍ തന്റെ കൂട്ടായ പീനട്ട് എന്ന പട്ടിയെയും കൂട്ടി സഊദി എയര്‍ലൈന്‍സില്‍ ബംഗളൂരിലേക്ക് യാത്ര തിരിച്ചത്.

റിയാദിലെ സഫ മക്ക പോളി ക്ലിനിക്കില്‍ നഴ്‌സായി പത്തു വര്‍ഷത്തോളം ജോലി ചെയ്തു നാട്ടിലേക്ക് പോകുന്നതിനിടയിലാണ് തന്റെ അരുമയായ വളര്‍ത്തുനായ 'ചിഹ്വോഹുവ ' ഇനത്തില്‍ പെട്ട മൂന്നു വയസുകാരി പീനട്ടിനെയും കൂടെ കൂട്ടാന്‍ ഇവര്‍ തീരുമാനിച്ചത്.

എന്നാല്‍, ഇതിലെ നൂലാമാലകള്‍ ഇവര്‍ക്ക് വിലങ്ങുതടിയാവുകയായിരുന്നു.

ഫിന്‍ലാന്റിലെ ആശുപത്രിയില്‍ നഴ്‌സായി നിയമനം കിട്ടിയതിനെ തുടര്‍ന്നാണ് ഷെറിന്‍ സഫ മക്ക പോളി ക്ലിനിക്കിലെ ജോലി അവസാനിപ്പിച്ച് ഫൈനല്‍ എക്‌സിറ്റില്‍ നാട്ടില്‍ പോകാന്‍ തീരുമാനിച്ചത്.

എന്നാല്‍ തന്റെ അരുമയായ പട്ടിക്കുട്ടിയെ ഉപേക്ഷിക്കാന്‍ മനസ്സു വന്നില്ല. തുടര്‍ന്നാണ്, അതിനുള്ള ഒരുക്കങ്ങള്‍ ആരംഭിച്ചത്. പാസ്‌പോര്‍ട്ട്, മൃഗഡോക്ടറില്‍നിന്നുള്ള ആരോഗ്യ ഫിറ്റ്‌നസ് സര്‍ട്ടിഫിക്കറ്റ്, വാക്‌സിന്‍ നല്‍കിയതിന്റെ രേഖകള്‍, സഊദി അറേബ്യയില്‍നിന്ന് വളര്‍ത്തു മൃഗങ്ങളെ മറ്റൊരു രാജ്യത്തേക്ക് കൊണ്ടുപോകാനുള്ള പരിസ്ഥിതി മന്ത്രാലയത്തിന്റെ അനുമതി തുടങ്ങിയ രേഖകള്‍ തുടങ്ങിയവ സംഘടിപ്പിക്കാനായി വിവിധ മന്ത്രാലയ ഓഫീസുകളാണ് ഷെറിന് കയറി ഇറങ്ങേണ്ടി വന്നത്.

ഒടുവില്‍ റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തില്‍നിന്നുള്ള സഊദി എയര്‍ലൈന്‍സിന്റെ 896 ആം നമ്പര്‍ വിമാനത്തില്‍ കഴിഞ്ഞ ദിവസം പീനട്ടും നാട്ടില്‍ വിമാനമിറങ്ങി.

റിയാദില്‍ വിമാനത്താവളത്തിലെ സുരക്ഷാ പരിശോധനക്കു ശേഷം പീനട്ടിന്റെ ശരീരത്തില്‍ ഘടിപ്പിച്ച മൈക്രോ ചിപ്പ് കാര്‍ഡ് എമിഗ്രേഷന്‍ വിഭാഗം സ്‌കാന്‍ ചെയ്ത് പരിശോധിച്ചു ഉറപ്പുവരുത്തിയാണ് ബോര്‍ഡിംഗ് പാസ് നല്‍കിയത്.

ഫിന്‍ലാന്റിലേക്ക് പോകുന്ന ഷെറിന്‍ അടുത്ത യാത്രയിലും പീനട്ടിനെ കൂടെ കൂട്ടാനുള്ള ഒരുക്കത്തിലാണ്. പട്ടിക്കുട്ടിയെ കൊണ്ടുവരുന്നതിന് ഫിന്‍ലാന്റ് ആശുപത്രി അധികൃതര്‍ അനുവാദം നല്‍കുകയും ചെയ്തിട്ടുണ്ട്.

ചെങ്ങന്നൂര്‍ സ്വദേശിയും ചെന്നൈയില്‍ താമസക്കാരനുമായ ഭര്‍ത്താവ് അലക്‌സാണ്ടര്‍ റിയാദില്‍ സ്വകാര്യ കമ്പനിയില്‍ ഉദ്യോഗസ്ഥനാണ്. ആനന്ദ് കുമാര്‍, ഡെല്‍സി റാണി എന്നിവരാണ് മാതാപിതാക്കള്‍.