ന്യൂഡല്‍ഹി: അതിഥി തൊഴിലാളികളെ നാട്ടിലെത്തിക്കുന്നതിന് റെയില്‍വേ പണം ഈടാക്കുന്നതിനെതിരേ കോണ്‍ഗ്രസ് നേതാവ് രാഹുല്‍ ഗാന്ധി.
ഒരുഭാഗത്ത് നിര്‍ധനരായ തൊഴിലാളികളില്‍ നിന്ന് യാത്രാ കൂലി ഈടാക്കുന്ന റെയില്‍വേ മറുഭാഗത്ത് പി.എം കെയര്‍ ഫണ്ടിലേക്ക് 151 കോടി രൂപ സംഭാവന ചെയ്‌തെന്നു രാഹുല്‍ വിമര്‍ശിച്ചു.
ട്രെയിന്‍ സര്‍വിസ് പൂര്‍ണമായി നിര്‍ത്തലാക്കിയ ശേഷം 40 ദിവസത്തിനു ശേഷമാണ് പ്രത്യേക ശ്രാമിക് ട്രെയിനുകളിലൂടെ തൊഴിലാളികളെ റെയില്‍വേ നാട്ടിലെത്തിക്കുന്നത്.
ഇതില്‍ ആദ്യ ശ്രാമിക് ട്രെയിന്‍ മെയ് ഒന്നിന് 1,200 യാത്രക്കാരുമായി തെലങ്കാനയില്‍ നിന്ന് ജാര്‍ഖണ്ഡിലേക്ക് പുറപ്പെട്ടിരുന്നു. തുടര്‍ന്ന് വിവിധ സംസ്ഥാന സര്‍ക്കാരുകളുടെ അഭ്യര്‍ഥന പരിഗണിച്ച് ഇതുപോലുള്ള 25 ശ്രാമിക് ട്രെയിന്‍ സര്‍വിസുകളാണ് റെയില്‍വേ നടത്തുന്നത്.
ഇതില്‍ യാത്ര ചെയ്യുന്നതിനായി റെയില്‍വേ ആര്‍ക്കും ടിക്കറ്റ് നല്‍കുന്നില്ലെന്നും സംസ്ഥാന സര്‍ക്കാരില്‍ രജിസ്റ്റര്‍ ചെയ്ത നിശ്ചിത ആളുകള്‍ക്ക് മാത്രമാണ് യാത്ര ചെയ്യാന്‍ അവസരമെന്നും റെയില്‍വേ പറയുന്നു.