തളിപ്പറമ്പ്: കുറുമാത്തൂരില്‍ പൊലിസ് ഡമ്പിങ് ഗ്രൗണ്ട് സ്ഥാപിച്ച് രണ്ടു വര്‍ഷം തികയാറായിട്ടും എയ്ഡ്‌പോസ്റ്റില്‍ വൈദ്യുതി ലഭിക്കാത്തതിനാല്‍ പാറാവ് ഡ്യൂട്ടിയിലുളള ഹോംഗാര്‍ഡുകള്‍ ദുരിതമനുഭവിക്കുന്നു. തളിപ്പറമ്പ് ഡിവിഷനിലെ സ്റ്റേഷന്‍ വളപ്പുകളിലും സമീപത്തുളള സ്വകാര്യ വ്യക്തികളുടെ സ്ഥലങ്ങളിലും റോഡരികിലും കൂട്ടിയിട്ട വാഹനങ്ങള്‍ പൊലിസിനും, നിരവധി ആവശ്യങ്ങള്‍ക്കായി സ്റ്റേഷനുകളിലെത്തുന്ന പൊതുജനങ്ങള്‍ക്കും ഒരുപോലെ തലവേദനയായതോടെയാണ് 2017 ജൂലായില്‍ സി.ഐ ആയിരുന്ന പി.കെ സുധാകരന്‍ വിഷയം ഉന്നതരുടെ ശ്രദ്ധയില്‍ പെടുത്തിയത്. തുടര്‍ന്ന് പ്രശ്‌ന പരിഹാരത്തിനായി റവന്യു മന്ത്രി, കലക്ടര്‍, എസ്.പി എം.എല്‍.എമാര്‍ തളിപ്പറമ്പ് നഗരസഭ ചെയര്‍മാന്‍, കുറുമാത്തൂര്‍ പഞ്ചായത്ത് പ്രസിഡന്റ്, മറ്റ് ജന പ്രതിനിധികള്‍ എന്നിവര്‍ മുന്‍കൈയ്യെടുക്കുകയായിരുന്നു. തളിപ്പറമ്പ് തഹസില്‍ദാരുടെ നേതൃത്വത്തിലുളള റവന്യു സംഘം കണ്ടെത്തിയ തളിപ്പറമ്പ് ശ്രീകണ്ഠാപുരം സംസ്ഥാന പാതയില്‍ കുറുമാത്തൂര്‍ വില്ലേജിലെ വെള്ളാരംപാറയിലെ ഒന്നേകാല്‍ ഏക്കര്‍ സ്ഥലത്താണ് ഡമ്പിങ് ഗ്രൗണ്ട് ഒരുക്കിയത്. തളിപ്പറമ്പ്, പരിയാരം, പഴയങ്ങാടി എന്നീ സ്റ്റേഷനുകളില്‍ നിന്നായി നാന്നൂറിലേറെ വാഹനങ്ങളാണ് കുറുമാത്തൂര്‍ ഡമ്പിങ് ഗ്രൗണ്ടിലെത്തിച്ചത്. ഏറെ മുറവിളികള്‍ക്കു ശേഷം പ്രാഥമിക കര്‍മങ്ങള്‍ക്കുള്ള സൗകര്യം ഒരുക്കുന്നപ്രവര്‍ത്തി അവസാന ഘട്ടത്തിലാണ്. ഫാനുകള്‍ ഉപയോഗിച്ചാല്‍ പോലും ചൂടിന് ശമനമില്ലാതെ ആളുകള്‍ ബുദ്ധിമുട്ടുമ്പോഴാണ് തണല്‍ മരങ്ങള്‍ പോലുമില്ലാത്ത സ്ഥലത്ത് രാവും പകലും കാറ്റും വെളിച്ചവുമില്ലാതെ കാവല്‍ നില്‍ക്കേണ്ടി വരുന്നത്. പണമടച്ചാലുടല്‍ വൈദ്യുതി ലഭിക്കുമെന്നിരിക്കെ ഇതിനുളള അപേക്ഷ പോലും ഇതുവരെ ലഭിച്ചിട്ടില്ലെന്നാണ് കെ.എസ്.ഇ.ബിയുമായി ബന്ധപ്പെട്ടവര്‍ പറയുന്നത്.