കൊച്ചി: സ്വര്‍ണക്കടത്തുകേസില്‍ പ്രതികളെ സഹായിച്ചെന്ന് ആരോപണമുള്ള വ്യവസായി കിരണിന് മുഖ്യമന്ത്രിയുമായി ഉറ്റബന്ധമുണ്ടെന്ന് യു.ഡി.എഫ് കണ്‍വീനര്‍ ബെന്നി ബഹനാന്‍.
കേസിലെ പ്രതി സ്വപ്നയെ കേരളം വിടാന്‍ സഹായിച്ചത് സി.പി.എമ്മിലെ ഉന്നതരുമായി ബന്ധമുള്ള പള്ളിത്തോട് സ്വദേശിയായ ഈ വ്യവസായിയാണ്. മുഖ്യമന്ത്രിയുമായി അടുത്ത ബന്ധമുള്ളയാളാണ് കിരണ്‍. ഭരണകക്ഷി നേതാക്കളില്‍ പലരും കിരണിന്റെ വീട്ടിലെ നിത്യസന്ദര്‍ശകരാണ്.ഈ കാര്യങ്ങള്‍ എന്‍.ഐ.എ അന്വേഷിക്കണമെന്ന് അദ്ദേഹം ആവശ്യപ്പെട്ടു.
അരൂര്‍ ഉപതെരഞ്ഞെടുപ്പ് കാലത്തും കിരണിന്റെ വീട്ടില്‍ സി.പി.എമ്മിലെ ഉന്നതന്‍മാരെത്തി. ഇയാളുടെ കുഞ്ഞിന്റെ മാമോദീസ ചടങ്ങിലും സി.പി.എം നേതാക്കളെത്തി.
സ്വര്‍ണക്കടത്തുമായി ബന്ധപ്പെട്ട ബാഗുകള്‍ കൈമാറിയത് കിരണിന്റെ വീട്ടില്‍ വച്ചാണെന്നും അദ്ദേഹം പറഞ്ഞു.
ഫെറ നിയമം ലംഘിച്ച മന്ത്രി ജലീലിനെതിരേ കോടതിയെ സമീപിക്കും. യു.എ.ഇ കോണ്‍സുലേറ്റിലെ ഗണ്‍മാന്റെ കാലാവധി നീട്ടിയത് മുഖ്യമന്ത്രിയുടെ വിശ്വസ്തനായ ഡി.ജി.പിയാണ്. തന്ത്രപ്രധാന സ്ഥാനത്ത് ഗണ്‍മാന്‍ വന്നത് ദുരൂഹമാണെന്നും യു.ഡി.എഫ് കണ്‍വീനര്‍ പറഞ്ഞു.