മാവൂര്‍: പഞ്ചായത്തിലെ ആരോഗ്യ ജാഗ്രതാ പരിപാടികളുടെ ഭാഗമായി സമ്പൂര്‍ണ ശുചീകരണ പ്രവര്‍ത്തനങ്ങള്‍ക്കുള്ള മാര്‍ഗ രേഖയായി. ഇതിന്റെ ഭാഗമായി പഞ്ചായത്തില്‍ കുടിവെള്ളം വിതരണം ചെയ്യുന്നവര്‍ അതിന്റെ ഗുണനിലവാര പരിശോധന നടത്തിയശേഷം മാത്രമേ വിതരണം ചെയ്യാവൂ. കൂടാതെ പരിശോധനാ റിപ്പോര്‍ട്ട് വാഹനത്തില്‍ സൂക്ഷിക്കുകയും വേണം.
വാഹനത്തിന്റെ വിശദ വിവരം പഞ്ചായത്തിലും വെള്ളം ശേഖരിക്കുന്നതിന്റെ വിശദാംശം ചെറുപ്പ ഹെല്‍ത്ത് സെന്ററിലും രെജിസ്റ്റര്‍ ചെയ്യണം. വെള്ളം സ്വീകരിക്കുന്നവര്‍ അംഗീകൃത വാഹനത്തില്‍ നിന്നും മാത്രമേ വെള്ളം സ്വീകരിക്കാവൂ. ലഭിക്കുന്ന വെള്ളം രോഗാണു മുക്ത മായിരിക്കണം. പരിശോധനക്കിടയില്‍ വെള്ളത്തിന്റെ റിസല്‍ട്ട് ഇല്ലാതെ കുടിവെള്ളം വിതരണം ചെയ്യുന്നത് ശ്രദ്ധയില്‍ പെട്ടാല്‍ പൊതുജനാരോഗ്യ നിയമ പ്രകാരം പിഴ ഉള്‍പ്പെടെയുള്ള നിയമ നടപടികള്‍ സ്വീകരിക്കുന്നതാണ്. ഏപ്രില്‍ 29, 30 തിയതികളിലായി ആരോഗ്യ വളണ്ടിയര്‍, ഹരിത കര്‍മ സേന എന്നിവര്‍ക്ക് പരിശീലനം നല്‍കാന്‍ തീരുമാനിച്ചു. ഇതര സംസ്ഥാന തൊഴിലാളികളെ താമസിപ്പിക്കുന്ന സ്ഥലങ്ങളില്‍ പരിശോധന നടത്തി നടപടി സ്വീകരിക്കുന്നതാണ്. പാചക തൊഴിലാളികള്‍ മെഡിക്കല്‍ പരിശോധന നടത്തണം. ഫിറ്റ്‌നസ് സര്‍ട്ടിഫിക്കറ്റ് ഉള്ളവര്‍ മാത്രമേ ഭക്ഷണം പാചകം ചെയ്യാനും വിതരണം ചെയ്യാനും പാടുള്ളൂ. ആവശ്യമായ ബോധവല്‍ക്കരണം നല്‍കിയ ശേഷം പഞ്ചായത്തിലെ മുഴുവന്‍ വീട്ടുകാരുടേയും സഹകരണത്തോടെ മെയ് ആദ്യവാരം ശുചിത്വ ദിനം നടത്താന്‍ തീരുമാനിച്ചു.
ഏപ്രില്‍ മുതല്‍ ആരോഗ്യവകുപ്പിന്റെ ഊര്‍ജിത പരിശോധന ഉണ്ടാകുമെന്നും പിഴ ഉള്‍പ്പെടെയുള്ള നടപടികളുമായി മുന്നോട്ട് പോകുമെന്നും ഹെല്‍ത്ത് ഇന്‍സ്‌പെക്ടര്‍ ടി. അബ്ദുല്‍ മജീദ്, ഹെല്‍ത്ത് സൂപ്പര്‍വൈസര്‍ മുരളീധരന്‍ എന്നിവര്‍ അറിയിച്ചു. പഞ്ചായത്ത് പ്രസിഡന്റ് മുനീറത്ത് അധ്യക്ഷയായി. ആരോഗ്യസ്റ്റാന്റിങ് കമ്മിറ്റി ചെയര്‍ പേഴ്‌സന്‍ കവിതാ ഭായി, സജയശ്രീ ദിവ്യപ്രകാശ്, ബിന്ദു എന്നിവര്‍ സംസാരിച്ചു.