വാടാനപ്പള്ളി: തൃപ്രയാര്‍ ബൈപ്പാസ് നിര്‍മാണവുമായി ബന്ധപ്പെട്ട അംഗീകാരം കിട്ടിയ വില്‍ബര്‍ സ്മിത്ത് കണ്‍സള്‍ട്ടന്‍സിയുടെ അലൈന്‍മെന്റ് പ്രൊപ്പോസലില്‍ ഒരു മാറ്റവും വരുത്താന്‍ അനുവദിക്കില്ലെന്ന് വലപ്പാട്, നാട്ടിക ഗ്രാമപഞ്ചായത്തുകളിലെ ജനങ്ങളുടെ സംയുക്ത ആക്ഷന്‍ കൗണ്‍സില്‍ യോഗം. ഏറ്റവും കുറവ് വീടുകളും സ്ഥലവും നഷ്ടപ്പെടുന്ന വിധമുള്ള പഴയ സര്‍വെയാണ് ജനങ്ങള്‍ അംഗീകരിച്ചത്. അംഗീകാരം ലഭിച്ച് സര്‍ക്കാര്‍ കല്ലിട്ടത് പ്രകാരം വീടുകള്‍ അലൈന്‍മെന്റില്‍ നിന്നും ഇറക്കിപ്പണിതതിലൂടെയാണ് പുതിയ ഫീഡ് ബാക്ക് സര്‍വെ കടന്നുപോകുന്നത്. ഒരു കിലോമീറ്റര്‍ സ്ഥലം കൂടുതലായി നഷ്ടപ്പെടുകയും ചെയ്യും. ദേശീയപാതാ അധികൃതരുടെ എന്‍.ഒ.സി ഇല്ലാതെ പഴയ അലൈന്‍മെന്റില്‍ പുതിയ വീടുകള്‍ പണിയാന്‍ വലപ്പാട് പഞ്ചായത്ത് അനുമതി നല്‍കിയത് സര്‍വെ അട്ടിമറിക്കാനാണെന്നും ആക്ഷന്‍ കൗണ്‍സില്‍ ആരോപിക്കുന്നു. പഴയ അലൈന്‍മെന്റിലെ ഭൂമി വാങ്ങിക്കൂട്ടി സര്‍വെ മാറ്റിമറിക്കാന്‍ ഭൂമാഫിയ ശ്രമിക്കുന്നുണ്ടെന്നും ആരോപണം ഉയരുന്നുണ്ട്. ഇന്ന് വൈകീട്ട് നാലിന് നാട്ടിക പഞ്ചായത്ത് ഹാളില്‍ ജനങ്ങളുടെ പൊതുയോഗം വിളിച്ച് സമരപരിപാടികള്‍ക്ക് തുടക്കം കുറിക്കും. വലപ്പാട് പഞ്ചായത്ത് ആക്ഷന്‍ കൗണ്‍സില്‍ കോ  ഓര്‍ഡിനേറ്റര്‍മാരായി ഷീല ഉള്ളാട്ടില്‍, സലിം.കെ, മിഷോ. കെ.എച്ച്, കണ്ണന്‍ മേത്തില്‍ എന്നിവരെയും നാട്ടിക പഞ്ചായത്ത് കോ  ഓര്‍ഡിനേറ്റര്‍മാരായി ബിന്ദു പ്രദീപ്, പി.എം സിദ്ദിഖ്, സി.ജി അജിത് കുമാര്‍ എന്നിവരെയും തെരഞ്ഞെടുത്തു. നാട്ടിക പഞ്ചായത്ത് മുന്‍ പ്രസിഡന്റ് അനില്‍ പുളിക്കല്‍ യോഗം ഉദ്ഘാടനം ചെയ്തു. തളിക്കുളം ബ്ലോക്ക് പഞ്ചായത്ത് അംഗം കെ.ജെ യദുകൃഷ്ണ അധ്യക്ഷനായി. നാട്ടിക പഞ്ചായത്ത് പ്രസിഡന്റ് പി.വിനു, പി.കെ ശങ്കരനാരായണന്‍ മാസ്റ്റര്‍, കെ.സലിം, ഷീല ഉള്ളാട്ടില്‍, കെ.എച്ച് മിഷോ, സന്ദീപ് കരുവത്തില്‍ എന്നിവര്‍ പ്രസംഗിച്ചു.