കൊണ്ടോട്ടി: തദ്ദേശ സ്ഥാപനങ്ങളില്‍ ഉപയോഗിച്ചുവരുന്ന പ്രീ-പ്രിന്റഡ് രസീതുകള്‍ പൂര്‍ണമായും ഒഴിവാക്കി എ ഫോര്‍ പേപ്പറില്‍ ഏകീകൃത രീതിയിലേക്ക് രസീതികള്‍ മാറ്റുന്നു. പണം ഒടുക്കിയതിനും അപേക്ഷകള്‍ക്കുമുള്ള കൈപ്പറ്റ് രസീത്, അപേക്ഷകളിലുള്ള ന്യൂനതകള്‍ അറിയിച്ചുള്ള കത്ത് എന്നിവയാണ് ഏകീകൃത സ്വഭാവത്തിലേക്ക് മാറ്റുന്നത്. രസീതികളും ബില്ലുകളും നല്‍കുമ്പോഴുണ്ടാകുന്ന ആക്ഷേപങ്ങളും പരാതികളും വര്‍ധിച്ചതോടെയാണ് സേവനങ്ങള്‍ കാര്യക്ഷമവും വേഗത്തിലുമാക്കാന്‍ ഏകീകൃതരീതിയിലേക്ക് മാറ്റുന്നത്.
തദ്ദേശ സ്ഥാപനങ്ങളില്‍ നിലവില്‍ ഗ്രാമലക്ഷ്മി മുദ്രാലയം നല്‍കുന്ന ഫോമുകള്‍ ഉപയോഗിച്ചാണ് രസീതുകളും ബില്ലുകളും നല്‍കുന്നത്. മുന്‍കൂട്ടി പ്രിന്റ് ചെയ്ത പേപ്പറില്‍ രസീത് നമ്പര്‍, പണം തുടങ്ങിയവ ചേര്‍ത്തുള്ള ബില്ലുകളാണ് പ്രീ-പ്രിന്റ് വഴി തദ്ദേശ സ്ഥാപനങ്ങളുടെ ഫ്രണ്ട് ഓഫിസുകളില്‍നിന്ന് നല്‍കി വരുന്നത്. ഇത്തരം ബില്ലുകളില്‍ പ്രിന്റ് തെളിയാതിരിക്കല്‍, പെട്ടെന്ന് ഉപയോഗ ശൂന്യമാകല്‍, അക്ഷരങ്ങള്‍ മങ്ങിപ്പോകല്‍ തുടങ്ങിയവ കാരണം ആക്ഷേപങ്ങളും പരാതികളും ഏറിവരികയാണ്. കൊവിഡ് മൂലം ഓണ്‍ലൈനിലാണ് അപേക്ഷകള്‍ നല്‍കുന്നത്. ഇതോടെയാണ് ഡോട്ട്മാറ്റ്‌റിക്‌സ് പ്രിന്റര്‍ ഒഴിവാക്കി ലേസര്‍ പ്രിന്റര്‍ ഉപയോഗിച്ച് ബില്ലുകള്‍ മാറ്റി നല്‍കുന്നത്. ഐ.കെ.എം വികസിപ്പിച്ച ഐ.എല്‍.ജി.എം.എസ് സോഫ്റ്റ് വെയറിന്റെ സഹായത്തോടെയാണ് ബില്ലുകള്‍ നല്‍കുന്നത്.