തിരുവമ്പാടി: ഉപയോഗിച്ച നാപ്കിനുകള്‍ റോഡരികുകളില്‍ തള്ളുന്നതായി പരാതി. പഞ്ചായത്തിന്റെ നേതൃത്വത്തില്‍ നടക്കുന്ന 'ക്ലീന്‍ തിരുവമ്പാടി'യുടെ ഭാഗമായി നടന്ന അജൈവ മാലിന്യ ശേഖരണത്തിനിടെയാണ് വലിയ രീതിയില്‍ ഇത്തരത്തിലുള്ള മാലിന്യങ്ങള്‍ കണ്ടെത്തിയത്.
പഞ്ചായത്തിന്റെ വിവിധ ഭാഗങ്ങളില്‍ നിന്നാണ് ഹരിത കര്‍മസേന അജൈവ മാലിന്യം ശേഖരിക്കുന്നത്. ഇവ പിന്നീട് തരം തിരിച്ച് അയക്കലാണ് പതിവ്. ഇതിന്റെ ഭാഗമായി ഇന്നലെ തിരുവമ്പാടി ടൗണിന്റെ വിവിധ ഭാഗങ്ങളില്‍ നിന്നായി ശേഖരിച്ച മാലിന്യങ്ങള്‍ മൂന്നു ലോഡായി അയക്കുകയും ചെയ്തിരുന്നു. ഇതിനു വേണ്ടി തരം തിരിക്കുന്നതിനിടയിലാണ് ഉപയോഗിച്ച നാപ്കിനുകള്‍ കണ്ടെത്തിയത്. ഒരു കെട്ട് നിറയെ ഉണ്ടായതിനാല്‍ വീടുകളില്‍ നിന്നല്ല എന്ന നിഗമനത്തിലാണ് അധികൃതര്‍. ഹോസ്റ്റലുകളില്‍ നിന്നോ മറ്റോ ആകാനാണ് സാധ്യത. സ്വകാര്യമായി സംസ്‌ക്കരിക്കേണ്ടവ പരസ്യമായി പ്രദര്‍ശിപ്പിച്ചതില്‍ പ്രദേശത്ത് പ്രതിഷേധം ഉയരുന്നുണ്ട്.