ഹൈദരാബാദ്: ഐ.പി.എല്ലിലെ നിര്‍ണായക പോരാട്ടത്തില്‍ പഞ്ചാബിനെതിരേ ഹൈദരാബാദിന് 45 റണ്‍സ് വിജയം. ഇതോടെ ഹൈദരാബാദ് 12 പോയിന്റോടെ പ്ലേ ഓഫ് സാധ്യത നിലനിര്‍ത്തി.

ആദ്യം ബാറ്റ് ചെയ്ത ഹൈദരാബാദ് 6 വിക്കറ്റ് നഷ്ടത്തില്‍ 212 റണ്‍സെടുത്തു.മറുപടി ബാറ്റിങ്ങിനിറങ്ങിയ പഞ്ചാബി ന് എട്ട് വിക്കറ്റ് നഷ്ടത്തില്‍ 167 റണ്‍സ് എടുക്കാനേ സാധിച്ചുള്ളൂ. ടോസ് ലഭിച്ച പഞ്ചാബ് നായകന്‍ ആര്‍. അശ്വിന്‍ ബൗളിങ് തിരഞ്ഞെടുക്കുകയായിരുന്നു. വാര്‍ണറും സാഹയും മികച്ച തുടക്കമായിരുന്നു നല്‍കിയത്. പതിയെ സ്‌കോര്‍ ബോര്‍ഡ് ചലിപ്പിക്കുന്നതിനിടയില്‍ ടീം സ്‌കോര്‍ 78 റണ്‍സിലെത്തിയപ്പോഴായിരുന്നു ഹൈദരാബാദിന്റെ ആദ്യ വിക്കറ്റ് വീണത്.

13 പന്തില്‍ 28 റണ്‍സുമായി വൃദ്ധിമാന്‍ സാഹയായിരുന്നു പുറത്തായത്. പിന്നീടെത്തിയ മനീഷ് പാണ്ഡെയും വാര്‍ണര്‍ക്ക് മികച്ച പിന്തുണ നല്‍കി. എന്നാല്‍ ടീം സ്‌കോര്‍ 160 എത്തിയപ്പോള്‍ പാണ്ഡെയും പുറത്തായി. സ്‌കോര്‍ ബോര്‍ഡിലേക്ക് 36 റണ്‍സ് സംഭാവന നല്‍കിയാണ് പാണ്ഡെ പുറത്തായത്. അധികം വൈകാതെ വാര്‍ണറും പുറത്തായി. പഞ്ചാബ് ബൗളര്‍മാരെ അടിച്ചുപരത്തിയ വാര്‍ണറെ അശ്വിന്റെ പന്തില്‍ മുജീബ് റഹ്മാന്‍ പിടിച്ച് പുറത്താക്കുകയായിരുന്നു. 56 പന്ത് നേരിട്ട വാര്‍ണര്‍ 81 റണ്‍സ് സ്‌കോര്‍ ബോര്‍ഡിലേക്ക് ചേര്‍ത്തു.
പിന്നീട് മുഹമ്മദ് നബിയും കെയ്ന്‍ വില്യംസണും ശ്രദ്ധയോടെ കളിച്ചു. പക്ഷെ അധികം വൈകാതെ കെയ്ന്‍ വില്യംസണ്‍ പുറത്തായി. ഏഴ് പന്തില്‍ നിന്ന് 14 റണ്‍സുമായിട്ടായിരുന്നു കെയ്‌നിന്റെ മടക്കം. പഞ്ചാബിന് വേണ്ടി കെ.എല്‍ രാഹുല്‍ 79(56) മാത്രമാണ് മികച്ച പ്രകടനം കാഴ്ചവെച്ചത്. ഹൈദരാബാദിന് വേണ്ടി റാഷിദ് ഖാന്‍ നാല് ഓവറില്‍ 21 റണ്‍സ് വഴങ്ങി മൂന്ന് വിക്കറ്റ് നേടി.