ദുബൈ: ഇന്നലെ നടന്ന രാജസ്ഥാന്‍- ചെന്നൈ ഐ.പി.എല്‍ മത്സരത്തില്‍ ചൈന്നൈ സൂപ്പര്‍ കിങ്‌സ് നായകന്‍ എം.എസ് ധോണി ഏഴാം നമ്പറില്‍ ഇറങ്ങിയതാണ് നിലവില്‍ കായികലോകത്തെ ചര്‍ച്ചാ വിഷയം. ധോണിയുടെ ഈ നീക്കത്തിനെതിരേ മുന്‍ ഇന്ത്യന്‍ ഓപ്പണര്‍മാരായ വിരേന്ദര്‍ സേവാഗും ഗൗതം ഗംഭീറും വിമര്‍ശനവുമായി രംഗത്തെത്തിയിരുന്നു. എന്നാല്‍ വിമര്‍ശനങ്ങളുടെ പൊങ്കാല തന്നെ ഉയര്‍ന്നതോടെ കാരണം വ്യക്തമാക്കി രംഗത്തെത്തിയിരിക്കുകയാണ് മുന്‍ ദേശീയ ടീം നായകന്‍.

'താന്‍ ബാറ്റു ചെയ്തിട്ട് ഏറെ നാളായി, ഇവിടുത്തെ 14 ദിവസത്തെ ക്വാറന്റൈന്‍ ബാറ്റിങ്ങില്‍ സഹായിച്ചിട്ടുമില്ല. വ്യത്യസ്ത കാര്യങ്ങള്‍ ചെയ്യേണ്ടതുണ്ടായിരുന്നു, അതിനാലാണ് സാമിന് അവസരം നല്‍കിയത്. ആ വ്യത്യസ്തമായ പരീക്ഷണം ഫലം കണ്ടില്ല'- ധോണി പറഞ്ഞു.
നേരത്തേ മുംബൈക്കെതിരായ മത്സരത്തില്‍ സാം കുറാനാണ് ടീമിന് ജയം അനുകൂലമാക്കിയത്. എന്നാല്‍ താരത്തെ നാലാം നമ്പറില്‍ ഇറക്കി ഗെയിമിന്റെ ഗിയര്‍ മാറ്റുമെന്ന ധോണിയുടെ തന്ത്രത്തിന് ചിറകു മുളച്ചില്ല. ആറു പന്തില്‍ ഒരു ബൗണ്ടറിയും രണ്ട് സിക്‌സറും ഉള്‍പ്പെടെ 17 റണ്‍സുമായി താരം മടങ്ങി. ഷാര്‍ജയിലെ സ്റ്റേഡിയം താരതമ്യേന വലുപ്പം കുറവായതിനാല്‍ സാമിന്റെ വെടിക്കെട്ട് ടീം സ്‌കോറിന് ഗുണം ചെയ്യുമെന്ന് കൂടി കരുതിയായിരുന്നു താരത്തിന് അവസരം നല്‍കിയതെന്നും ധോണി പറഞ്ഞു.

മത്സരത്തില്‍ 16 റണ്‍സിനാണ് രാജസ്ഥാന്‍ ജയിച്ചത്. ആദ്യം ബാറ്റുചെയ്ത രാജസ്ഥാന്‍ നിശ്ചിത ഓവറില്‍ ഏഴ് വിക്കറ്റ് നഷ്ടപ്പെടുത്തി 216 റണ്‍സെടുത്തപ്പോള്‍ ചെന്നൈയുടെ പോരാട്ടം ആറിന് 200 റണ്‍സില്‍ അവസാനിച്ചു. മലയാളി താരം സഞ്ജു സാംസന്റെ പ്രകടനമാണ് (32 പന്തില്‍ 74) ടീമിന്റെ ജയത്തിന് നിര്‍ണായകമായത്. നായകന്‍ സ്റ്റീവ് സ്മിത്തും(47 പന്തില്‍ 69) മികച്ച സംഭാവന നല്‍കി. മറുവശത്ത്, ഫാഫ് ഡു പ്ലെസിസ് ചെന്നൈക്ക് വേണ്ടി പൊരുതിയെങ്കിലും (37 പന്തില്‍ 72) കാര്യമുണ്ടായില്ല.