കൊല്ലം: ജില്ലയില്‍ എലിപ്പനി ബാധിച്ച് ചികിത്സയിലായിരുന്ന വീട്ടമ്മ മരിച്ചു. പരവൂര്‍ കൂനയില്‍ പാറയില്‍ക്കാവിന് സമീപം രാജി ഭവനില്‍ (പാറവിള) രാധാകൃഷ്ണ പിള്ളയുടെ ഭാര്യ സുജാതയാണ് (52) മരിച്ചത്.
കടുത്ത പനി ബാധിച്ച് ഏതാനും ദിവസം മുമ്പ് നെടുങ്ങോലം രാമറാവു താലൂക്കാശുപത്രിയില്‍ ചികിത്സയിലായിരുന്ന സുജാതയെ രോഗം മൂര്‍ഛിച്ചതിനെത്തുടര്‍ന്ന് കഴിഞ്ഞ ഞായറാഴ്ച തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ചികിത്സയിലിരിക്കെ ഇന്നലെ പുലര്‍ച്ചെ മരിച്ചു. മക്കള്‍: രാജി, രജനി. മരുമക്കള്‍: സതീഷ്‌കുമാര്‍, ഷാജി.
ജില്ലയുടെ വിവിധ ഭാഗങ്ങളില്‍ എട്ടു പേരില്‍ രോഗം സ്ഥിരീകരിച്ചു. നെടുമണ്‍കാവ്, പത്തനാപുരം, അഞ്ചല്‍, പടിഞ്ഞാറേക്കല്ലട, പാലത്തറ മേഖലകളിലായാണ് എട്ടു പേരില്‍ രോഗം സ്ഥിരീകരിച്ചത്. ജില്ലയില്‍ പ്രതിരോധചികിത്സാ സംവിധാനങ്ങള്‍ വിപുലീകരിച്ചതായി ജില്ലാ മെഡിക്കല്‍ ഓഫീസര്‍ വി.വി.ഷേര്‍ളി അറിയിച്ചു.