തലശ്ശേരി: വടകര ലോക്‌സഭാ മണ്ഡലത്തിലെ സ്വതന്ത്ര സ്ഥാനാര്‍ഥിയായിരുന്ന സി.ഒ.ടി നസീറിനെ വധിക്കാന്‍ ശ്രമിച്ച കേസില്‍ മുഖ്യപ്രതികള്‍ കോടതിയില്‍ കീഴടങ്ങി. കേസിലെ ഒന്നും രണ്ടും പ്രതികളായ കതിരൂര്‍ വേറ്റുമ്മല്‍ കൊയിറ്റി ഹൗസില്‍ ശ്രീജിന്‍ (26), കൊളശ്ശേരി ശ്രീലക്ഷ്മി ക്വാര്‍ട്ടേഴ്‌സില്‍ റോഷന്‍ (26) എന്നിവരാണ് തലശ്ശേരി ജുഡിഷ്യല്‍ ഒന്നാംക്ലാസ് കോടതിയില്‍ കീഴടങ്ങിയത്. ഇരുവരെയും കോടതി 14 ദിവസത്തേക്ക് റിമാന്‍ഡ് ചെയ്തു.
നസീറിനെ വെട്ടിപ്പരുക്കേല്‍പ്പിച്ചവരാണു കീഴടങ്ങിയ രണ്ടുപേരുമെന്ന് പൊലിസ് അറിയിച്ചു. അക്രമ സംഭവത്തില്‍ ഉള്‍പ്പെട്ട മറ്റൊരു പ്രതി അശ്വന്തിനെ നേരത്തെ അറസ്റ്റു ചെയ്തിരുന്നു.
പ്രതിയായ റോഷന് ഒളിവില്‍ കഴിയുന്നതിനു സഹായം ഒരുക്കിയെന്ന കുറ്റത്തിന് കൊളശ്ശേരിയിലെ വിശ്വാസിനെ (25) കഴിഞ്ഞ ദിവസം പൊലിസ് അറസ്റ്റു ചെയ്തിരുന്നു. കേസില്‍ അഞ്ചുപേരെ ഇതുവരെ അന്വേഷണസംഘം അറസ്റ്റു ചെയ്തു. പ്രതികള്‍ക്ക് നസീറിനെ കാണിച്ചു കൊടുത്ത സോജിത്തും (24) നേരത്തെ അറസ്റ്റിലായിരുന്നു. ഗൂഢാലോചന നടത്തിയ അഞ്ചു പ്രതികളെ ഇനിയും പിടികൂടാനുണ്ടെന്നും പൊലിസ് വ്യക്തമാക്കി.