ന്യൂഡല്‍ഹി: വിമാന യാത്രക്കൂലി വര്‍ധനവ് തടയാന്‍ അടിയന്തര ഇടപെടലുണ്ടാകുമെന്നു കേരളത്തിന് കേന്ദ്രത്തിന്റെ ഉറപ്പ്. വ്യോമയാന സെക്രട്ടറി വിമാന കമ്പനികളുടെ യോഗം വിളിക്കും. കേരളത്തിലെ വിമാനത്താവളങ്ങളുടെ വികസന പദ്ധതി തയാറാക്കുന്നതിനായി സംസ്ഥാനം സന്ദര്‍ശിക്കുമെന്നും മുഖ്യമന്ത്രിയുമായി നടത്തിയ കൂടിക്കാഴ്ചയില്‍ വ്യോമയാന സെക്രട്ടറി പ്രദീപ് സിങ് കരോള പറഞ്ഞു.

ആഘോഷവേളകളില്‍ അന്തരാഷ്ട്ര- ആഭ്യന്തര വിമാനയാത്രാ നിരക്കുകള്‍ കുതിച്ചുയരുന്നത് പതിവാണ്. ഇത്തരം വര്‍ധനവ് തടയാന്‍ സ്ഥിരം സംവിധാനം വേണമെന്നാണ് കേരളത്തിന്റെ ആവശ്യം. ഈദ് അവധി പ്രമാണിച്ച് കേരളത്തിലേക്കുള്ള വിമാന ടിക്കറ്റ് നിരക്കില്‍ വന്‍ വര്‍ധനവാണ് ഉണ്ടായത്. ഗള്‍ഫില്‍ നിന്ന് അടക്കമുള്ള പ്രവാസികളായ മലയാളികളെ ഇത് ബാധിച്ചിരുന്നു. ഇക്കാര്യം മുഖ്യമന്ത്രി കേന്ദ്ര വ്യോമയാന സെക്രട്ടറിയെ അറിയിച്ചിരുന്നു. തുടര്‍ന്നാണ് ഇക്കാര്യത്തില്‍ അടിയന്തര ഇടപെടല്‍ ഉണ്ടാകുമെന്ന് കേന്ദ്രം ഉറപ്പ് നല്‍കിയത്. ഇതിന്റെ അടിസ്ഥാനത്തില്‍ നിരക്ക് പരിധി വിട്ടുയരുന്നുണ്ടോയെന്ന് നിരീക്ഷിക്കാന്‍ ജൂലൈയില്‍ വ്യോമയാന കമ്പനികളുടെ യോഗം വിളിക്കും.