റിയാദ്: സഊദി ദേശീയ വിമാന കമ്പനിയായ സഊദിയയില്‍ ഇനി ആകാശത്തിരുന്നും പുറം ലോകവുമായി ലൈവില്‍ ബന്ധപ്പെടാം. ഇതിനായി തങ്ങളുടെ യാത്രക്കാര്‍ക്ക് സൗജന്യമായി ഇന്റര്‍നെറ്റ് സംവിധാനം ഏര്‍പ്പെടുത്തിയതായി കമ്പനി അറിയിച്ചു. ഫെയ്‌സ്ബുക്ക് മെസഞ്ചര്‍, ഐമെസജ് സംവിധാനങ്ങള്‍ വഴി യാത്രക്കാര്‍ ആകാശയാത്രക്കിടെ സന്ദേശങ്ങള്‍ അയക്കാനുള്ള സംവിധാനമാണ് ഒരുക്കിയിരിക്കുന്നത്. കഴിഞ്ഞ മെയ് മാസം മുതല്‍ വാട്‌സാപ്പ് ഉപയോഗിക്കാനുള്ള സൗകര്യം സഊദിയ നിലവില്‍ വരുത്തിയിരുന്നു. തുടര്‍ന്നാണ് കൂടുതല്‍ സൗകര്യങ്ങളുമായി സഊദി എയര്‍ലൈന്‍സ് രംഗത്തെത്തിയത്. സഊദിയയുടെ നൂറിലധികം വിമാനങ്ങളില്‍ ശനിയാഴ്ച മുതലാണ് സംവിധാനം സജ്ജീകരിച്ചത്.