തിരുവനന്തപുരം: സംസ്ഥാന സര്‍ക്കാരിന്റെ കീഴിലുള്ള അതിഥിമന്ദിരങ്ങളില്‍ മുറികള്‍ ബുക്ക് ചെയ്യുന്നതിനുള്ള അപേക്ഷകള്‍ ഇനിമുതല്‍ ഓണ്‍ലൈനായി മാത്രമേ സ്വീകരിക്കുകയുള്ളൂവെന്ന് പൊതുഭരണ (പൊളിറ്റിക്കല്‍) വകുപ്പ് അറിയിച്ചു. സ്റ്റേറ്റ് പ്രോട്ടോക്കോള്‍ എന്ന വെബ്‌പോര്‍ട്ടലിലൂടെയും പൊതുഭരണവകുപ്പിന്റെ ഔദ്യോഗിക വെബ്‌പോര്‍ട്ടലിലൂടെയും അപേക്ഷ സമര്‍പ്പിക്കാം.
താമസത്തിന് മുറി ആവശ്യമായ തിയതിക്ക് അഞ്ചു ദിവസം മുന്‍പ് മുതല്‍ ലഭ്യമായ അപേക്ഷകളില്‍ മുറികള്‍ അനുവദിച്ചു തുടങ്ങും. ഓണ്‍ലൈന്‍ അപേക്ഷയില്‍ രേഖപ്പെടുത്തിയ മൊബൈല്‍ നമ്പറില്‍ എസ്.എം.എസായി സ്റ്റാറ്റസ് അറിയിക്കും. ഔദ്യോഗിക ആവശ്യങ്ങള്‍ക്കുള്ള അപേക്ഷകള്‍ക്ക് സ്വകാര്യ അപേക്ഷകളേക്കാള്‍ മുന്‍ഗണന ഉണ്ടായിരിക്കും.