പയ്യന്നൂര്‍: ആര്‍.എസ്.എസ് മണ്ഡലം കാര്യവാഹക് കക്കംപാറയിലെ ചൂരക്കാട്ട് ബിജുവിനെ കൊലപ്പെടുത്തിയ കേസില്‍ മുഖ്യപ്രതിയായ ഡി.വൈ.എഫ്.ഐ നേതാവ് അറസ്റ്റില്‍.
ഡി.വൈ.എഫ്.ഐ പയ്യന്നൂര്‍ ബ്ലോക്ക് ട്രഷററും സി.പി.എം കുന്നരു ലോക്കല്‍ കമ്മിറ്റി അംഗവുമായ കുന്നത്തെരുവിലെ ടി.പി അനൂപ്(34)ആണ് അറസ്റ്റിലായത്.
കഴിഞ്ഞ ദിവസം രാത്രി 11 ഓടെ പയ്യന്നൂര്‍ കെ.എസ്.ആര്‍.ടി.സി ബസ്സ്റ്റാന്‍ഡില്‍നിന്നാണ് പയ്യന്നൂര്‍ സി.ഐ എം.പി ആസാദിന്റെ നേതൃത്വത്തിലുള്ള സംഘം അനൂപിനെ പിടികൂടിയത്. സംഭവത്തിനു ശേഷം കോയമ്പത്തൂരിലേക്കു കടന്ന ഇയാളെ മടക്കയാത്രക്കിടെയാണ് പൊലിസ് പിടികൂടിയത്. കൊലപാതകം ആസൂത്രണം ചെയ്തതും നടപ്പിലാക്കിയതും അനൂപിന്റെ നേതൃത്വത്തിലാണെന്ന് നേരത്തെ അന്വേഷണ സംഘം കണ്ടെത്തിയിരുന്നു.
കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു. കേസില്‍ നേരത്തെ പിടിയിലായ കക്കംപാറയിലെ റിനീഷ്, ജ്യോതിഷ്, സത്യന്‍, ജിതിന്‍ എന്നിവരും റിമാന്‍ഡിലാണ്. ഏഴു പ്രതികളില്‍ ഒരാള്‍ വിദേശത്തേക്ക് കടന്നതായും അന്വേഷണ സംഘത്തിനു സൂചന ലഭിച്ചിട്ടുണ്ട്.