കേളകം: അടയ്ക്കാത്തോട് വാളുമുക്ക് ആദിവാസി കോളനിയില്‍ ഒറ്റയാനയുടെ വിളയാട്ടം. തിങ്കളാഴ്ച രാത്രി എട്ടോടെയായിരുന്നു കോളനി മതിലിനു സമീപത്ത് താല്‍ക്കാലികമായി കെട്ടിയ വൈദ്യുത കമ്പിവേലി തകര്‍ത്ത് ഒറ്റയാന്‍ കോളനിയിലെത്തിയത്. ആനയെ കണ്ടയുടന്‍ കോളനിക്കാര്‍ ചിതറി ഓടുകയായിരുന്നു. ഓട്ടത്തിനിടയില്‍ രണ്ട് സ്ത്രീകള്‍ക്ക് പരുക്കേറ്റു. മണിക്കൂറുകളോളം കോളനിയില്‍ ഭീതിവിതച്ചാണ് ആന മടങ്ങിയത്.
ബന്ധപ്പെട്ട അധികാരികളെ വിവരം അറിയിച്ചിട്ടും അവര്‍ തിരിഞ്ഞുനോക്കാന്‍ തയാറായില്ലെന്ന് കോളനിവാസികള്‍ പറഞ്ഞു. രണ്ടാം തവണയാണ് പ്രദേശത്ത് കാട്ടാനയുടെ ആക്രമണം നടക്കുന്നത്. വൈദ്യുത വേലി ശ്വാശ്വത പരിഹാരമല്ലെന്ന് ബോധ്യമായതോടെ ആദിവാസികള്‍ ഭീതിയിലാണ്. വനപാലകര്‍ നടപടികള്‍ സ്വീകരിക്കണമെന്നും കോളനിക്കാര്‍ പറഞ്ഞു.