കണ്ണൂര്‍:  കന്നുകാലിയെ പരസ്യമായി അറുത്ത കേസില്‍ യൂത്ത് കോണ്‍ഗ്രസ് പ്രവര്‍ത്തകര്‍ ഉടന്‍ കീഴടങ്ങിയേക്കും.ഇവര്‍ക്കെതിരേ പുതിയൊരു വകുപ്പുകൂടി ചേര്‍ത്തു  പൊലിസ് കേസെടുത്തിട്ടുണ്ട്. വളര്‍ത്തു മൃഗങ്ങള്‍ക്കെതിരേ പരസ്യമായി ക്രൂരതകാണിച്ചതിനാണ് കേസെടുത്തത്.   ഇവര്‍ കാലിയെ കൊണ്ടുവരാന്‍ ഉപയോഗിച്ച വാഹനം കസ്റ്റഡിയിലെടുത്തു. കാട്ടാമ്പള്ളിയില്‍നിന്നാണ് വാന്‍  കഴിഞ്ഞ ദിവസം പിടിച്ചെടുത്തത്.
 യുവമോര്‍ച്ച ജില്ലാസെക്രട്ടറിയുടെ പരാതി പ്രകാരമാണ് നേരത്തെ പൊലിസ് എട്ടു യൂത്ത് കോണ്‍ഗ്രസ് പ്രവര്‍ത്തകര്‍ക്കെതിരേ കേസെടുത്തിരുന്നത്.   സംഭവം ദേശീയ തലത്തില്‍ വിവാദമായതിനെ തുടര്‍ന്ന് കേസില്‍ ഉള്‍പ്പെട്ട യൂത്ത് കോണ്‍ഗ്രസ് കണ്ണൂര്‍ പാര്‍ലമെന്റ് മണ്ഡലം കമ്മിറ്റി പ്രസിഡന്റ് റിജില്‍ മാക്കുറ്റി, യൂത്ത് കോണ്‍ സംസ്ഥാന സെക്രട്ടറി ജോഷി കണ്ടത്തില്‍, അഴീക്കോട് മണ്ഡലം പ്രസിഡന്റ് ഷറഫുദ്ദീന്‍ കാട്ടാമ്പള്ളി എന്നിവരെ സംഘടനയില്‍ നിന്ന് കഴിഞ്ഞ ദിവസം സസ്‌പെന്‍ഡ്  ചെയ്തിരുന്നു. കേസില്‍ഉള്‍പ്പെട്ടവര്‍ ഉടന്‍ കീഴടങ്ങുമെന്നു സൂചനയുണ്ട്. കണ്ണൂര്‍ സിറ്റി സി.ഐ കെ.വി പ്രമോദിന്റെ നേതൃത്വത്തിലുള്ള സംഘമാണ് കേസന്വേഷിക്കുന്നത്.