കുമ്പള: അവധി ദിനങ്ങള്‍ മുതലെടുത്ത് കുമ്പളയില്‍ കുന്നിടിക്കലും മണല്‍ കടത്തും സജീവമാവുന്നു. ഉദ്യോഗസ്ഥ ഒത്താശയോടെയാണ് കുമ്പളയിലും പരിസര പ്രദേശങ്ങളിലും ഇത്തരത്തില്‍ വ്യാപകമായി കുന്നുകള്‍ നിരപ്പാക്കി ചെമ്മണ്‍ കടത്തുന്നതെന്ന ആക്ഷേപമുണ്ട്.
കഴിഞ്ഞ രണ്ട് മാസത്തോളമായി തുടര്‍ച്ചയായി ഞായറാഴ്ചകളിലും മറ്റു അവധി ദിനങ്ങളിലുമാണ് ടിപ്പര്‍ ലോറികളിലൂടെയുള്ള മണ്‍കടത്തുകള്‍ നടക്കുന്നത്. ഈ ദിവസങ്ങളില്‍ നൂറുകണക്കിന് ലോഡ് മണ്ണുകളാണ് ഇത്തരത്തില്‍ വിവിധ പ്രദേശങ്ങളില്‍ നിന്ന് കടത്തി കൊണ്ടുപോകുന്നത്. ലോഡ് ഒന്നിന് എഴുന്നൂറ് രൂപ മുതല്‍ ആയിരം രൂപ വരെ ഇതിന് ഈടാക്കും. കുമ്പളയിലെയും സമീപ പ്രദേശങ്ങളിലെ പല കുന്നുകളിലും മണ്ണ് നീക്കംചെയ്തിട്ടുണ്ട്. കുന്നിടിക്കലിനെതിരേ ശക്തമായ നിയമം നിലനില്‍ക്കെ ഉദ്യോഗസ്ഥ ഒത്താശയോടെയാണ് ഇത്തരം നിയമലംഘനം നടക്കുന്നത്. അതേ സമയം പരാതിയെ തുടര്‍ന്ന് അനധികൃതമായി മണ്ണ് കടത്തുകയായിരുന്ന ലോറി കഴിഞ്ഞ ദിവസം കുമ്പള പൊലിസ് കസ്റ്റഡിയിലെടുത്തു.