കൊച്ചി: വഖ്ഫ് നിയമ ഭേദഗതിയെ കേരളവും സുപ്രിംകോടതിയിൽ എതിർക്കും. ഹരജി നൽകുന്നതിനുള്ള നിർദേശം സംസ്ഥാന സർക്കാർ നിയമ വകുപ്പ്   ഉദ്യോഗസ്ഥർക്ക്  നൽകിയതായി മന്ത്രി പി. രാജീവ് പറഞ്ഞു.  പുതിയ ചീഫ് ജസ്റ്റിസ് ബി.ആർ ഗവായി ചുമതലയേറ്റ ശേഷം രൂപീകരിക്കുന്ന ബെഞ്ച്  മുമ്പാകെയാണ് കേരളം ഹരജി നൽകുക.

നിയമത്തെ അനുകൂലിച്ച് ബി.ജെ.പി ഭരിക്കുന്ന സംസ്ഥാനങ്ങൾ സുപ്രിംകോടതിയെ സമീപിച്ച സാഹചര്യത്തിലാണ് എതിർത്ത് നിലപാട് അറിയിക്കാൻ കേരളവും തയാറാകുന്നത്.  വഖ്ഫ് നിയമ ഭേദഗതി  ഭരണഘടനാ അവകാശങ്ങൾക്ക് എതിരാണെന്ന വാദമാണ് കേരളം ഉയർത്തുന്നത്.

ഭരണഘടന നൽകുന്ന  മതപരമായ സ്വാതന്ത്യ്രത്തിനെതിരായ നിയമഭേദഗതികൾ എന്ന കാഴ്ചപാട് അവതരിപ്പിക്കുന്ന സംസ്ഥാന സർക്കാർ, നിയമ ഭേദഗതി  ഫെഡറൽ സംവിധാനത്തിൽ പ്രവർത്തിക്കുന്ന സംസ്ഥാന വഖ്ഫ് ബോർഡുകളെയും വഖ്ഫ് ട്രൈബ്യൂണലുകളെയും അസ്ഥിരപ്പെടുത്തുന്നതാണെന്ന നിലപാടാണ് മുന്നോട്ടുവയ്ക്കുന്നത്. വിശ്വാസപരമായ കാര്യങ്ങൾ പാലിച്ച്  ജനാധിപത്യപരമായി തെരഞ്ഞെടുക്കപ്പെട്ട സംസ്ഥാന വഖ്ഫ് ബോർഡുകളെ ദുർബലപ്പെടുത്തുന്ന നടപടികൾക്കെതിരേ കേരള നിയമസഭ പ്രമേയം പാസാക്കുകയും ചെയ്തിരുന്നു.

മതപരമായ ആവശ്യങ്ങൾക്കും ജീവകാരുണ്യ പ്രവർത്തനങ്ങൾക്കുമായി മതപരമായ വിശ്വാസത്തിൻ്റെ പേരിൽ നൽകപ്പെട്ട വസ്തുക്കളിൽ അവകാശം ഉന്നയിക്കുന്നതിനെതിരേ ഭരണഘടനാപരമായ ലംഘനം ചൂണ്ടിക്കാട്ടിയാണ്  സമസ്തയുടേത് ഉൾപ്പെടെ ഒരുകൂട്ടം ഹരജികൾ സുപ്രിം കോടതിയിൽ എത്തിയത്.  ഇതിൽ അഞ്ചെണ്ണം പരിഗണിച്ച സുപ്രിംകോടതി വിശദ വാദത്തിനിടയിൽ സംസ്ഥാന സർക്കാരുകളുടെ ഹരജികളും പരിഗണിക്കുന്നുണ്ട്.