ബംഗളൂരു: വസ്തുതാന്വേഷണ വെബ്‌സൈറ്റായ ആള്‍ട്ട്‌ന്യൂസ് സഹസ്ഥാപകനും മാധ്യമപ്രവര്‍ത്തകനുമായ മുഹമ്മദ് സുബൈറിനെതിരേ വീണ്ടും ഭീഷണിയുമായി വലതുപക്ഷ ഹിന്ദുത്വവാദികള്‍.
സുബൈറിന്റെ ഫോണ്‍ നമ്പറും ഇമെയില്‍ ഐ.ഡിയും വിലാസവും ഉള്‍പ്പെടെ സമൂഹമാധ്യമങ്ങള്‍ വഴി പ്രചരിപ്പിച്ച ശേഷമാണ് ഭീഷണി. കൂട്ട ഭീഷണിവന്നതോടെ അദ്ദേഹം ബംഗളൂരു ഡെപ്യൂട്ടി പൊലിസ് കമ്മിഷണര്‍ക്ക് (ഈസ്റ്റ്) പരാതി നല്‍കി. തന്റെ സ്വകാര്യ വിവരങ്ങള്‍, വിലാസം, നമ്പര്‍ എന്നിവ നല്‍കിയ ശേഷം മുഹമ്മദ് സുബൈറിന്റെ വീട്ടിലേക്ക് പന്നി മാംസം അടക്കമുള്ളവ എത്തിക്കണമെന്ന് സമൂഹമാധ്യമങ്ങളില്‍ പ്രചരിപ്പിക്കുന്നതായും പരാതിയില്‍ ചൂണ്ടിക്കാട്ടി.
ഭീഷണികളുടെ സ്‌ക്രീന്‍ഷോട്ടുകള്‍ സഹിതമാണ് പരാതി. 2023ലും സമാനമായി വീട്ടിലേക്ക് പന്നിമാംസം ലഭിച്ചിരുന്നു. ആ സമയത്ത് നല്‍കിയ പരാതിയില്‍ ഏതാനും മാസങ്ങള്‍ക്കുള്ളില്‍ നടപടികള്‍ അവസാനിപ്പിക്കുകയായിരുന്നെന്നും സുബൈര്‍ വിശദമാക്കി.

ഇന്ത്യയുടെ ഓപറേഷന്‍ സിന്ദൂര്‍ സമയത്ത് പാക് ആസ്ഥാനമായ സമൂഹമാധ്യമ അക്കൗണ്ടുകളില്‍നിന്നുണ്ടായ നിരവധി വ്യാജ പ്രചാരണങ്ങളുടെ വാസ്തവം വെളിപ്പെടുത്തിയതിന്റെ പേരില്‍ കഴിഞ്ഞദിവസങ്ങളില്‍ വിവിധ മാധ്യമങ്ങള്‍ സുബൈറിനെ പ്രശംസിച്ച് റിപ്പോര്‍ട്ടുകള്‍ തയാറാക്കിയിരുന്നു.