തുറവൂര്‍: കടല്‍ ക്ഷോഭം ശക്തമായതിനെ തുടര്‍ന്ന് പള്ളിത്തോട് ചാപ്പക്കടവ് തീരത്ത് നിന്ന് മല്‍സ്യബന്ധന വള്ളങ്ങള്‍ സുരക്ഷാ സ്ഥാനത്തേക്ക് മാറ്റി.
ചെറുതും വലതുമായ വള്ളങ്ങള്‍ റോഡുമാര്‍ഗമാണ് സുരക്ഷാ സ്ഥാനത്തേക്ക് മാറ്റിയത്. പ്രതികൂല കാലാവസ്ഥയുള്ളപ്പോഴും ധാരാളം വള്ളങ്ങളാണ് ചാപ്പക്കടവില്‍ കയറ്റി വയ്ക്കുന്നത്. വരും ദിവസങ്ങളില്‍ കടല്‍ കൂടുതല്‍ ശക്തമാകുമെന്നതിനാലാണ് വള്ളങ്ങളെല്ലാം സുരക്ഷാ സ്ഥാനത്തേക്ക് മാറ്റിയതെന്ന് മല്‍സ്യത്തൊഴിലാളികള്‍ പറഞ്ഞു.
എല്ലാ വര്‍ഷവും വള്ളങ്ങള്‍ കയറ്റി വച്ചിരിക്കുന്ന ചാപ്പക്കടവ് തീരത്തിന്റെ നല്ലൊരു ഭാഗം കടല്‍ കവരുന്നത് പതിവാണ്. ലക്ഷങ്ങള്‍ മുടക്കി നിര്‍മിച്ചിരിക്കുന്ന പുലിമുട്ടിന്റെ നിര്‍മാണം പാതിവഴിയിലായതാണ് ചാപ്പക്കടവ് തീരത്ത് എല്ലാ വര്‍ഷവും ശക്തമായ കടല്‍ക്ഷോഭം ഉണ്ടാകുന്നത്.
മല്‍സ്യങ്ങളുമായി അടുക്കാന്‍ വരുന്ന വള്ളങ്ങള്‍ പലപ്പോഴും കടല്‍ തിരയില്‍പ്പെട്ട് മറിഞ്ഞ് അപകടങ്ങള്‍ സംഭവിക്കുന്നത് പതിവാണ്. ഇതിനുമുമ്പുണ്ടായ പല അപകടങ്ങളില്‍നിന്നും അത്ഭുതകരമായാണ് രക്ഷപ്പെട്ടതെന്ന് തൊഴിലാളികള്‍ പറഞ്ഞു.
ചാപ്പക്കടവ് തീരത്ത് പുലിമുട്ടിന്റെ നിര്‍മാണം പൂര്‍ത്തിയാക്കിയാല്‍ ഏത് കാലാവസ്ഥയിലും വള്ളങ്ങള്‍ക്ക് കടലില്‍ പോകുവാന്‍ കഴിയുമെന്ന് മല്‍സ്യത്തൊഴിലാളികള്‍ പറയുന്നു.