കോഴിക്കോട്: തദ്ദേശ ഉപതെരഞ്ഞെടുപ്പിലെ യു.ഡി.എഫ് മുന്നേറ്റം കേരളത്തിലെ ഇടതുമുന്നണി സര്‍ക്കാരിനുള്ള താക്കീതെന്ന് മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്.
27 സീറ്റുകളില്‍ 15 സീറ്റുകള്‍ നേടിയാണ് യു.ഡി.എഫ് മുന്നേറിയത്. യു.ഡി.എഫ് ജയിച്ച നിരവധി സീറ്റുകള്‍ എല്‍.ഡി.എഫില്‍ നിന്ന് പിടിച്ചെടുത്തതാണ്. പത്ത് ജില്ലകളിലായി 15 സീറ്റുകള്‍ യു.ഡി.എഫ് നേടിയപ്പോള്‍ 11 സീറ്റുകളാണ് എല്‍.ഡി.എഫിന് ലഭിച്ചത്. കോഴിക്കോട് കുന്ദമംഗലം ബ്ലോക്ക് പഞ്ചായത്തിലെ പൂവാട്ടുപറമ്പ് ഡിവിഷനില്‍ രമ്യാ ഹരിദാസ് എം.പിയുടെ രാജിയെത്തുടര്‍ന്നുണ്ടായ ഉപതെരഞ്ഞെടുപ്പിലെ വന്‍ വിജയം പ്രത്യേകം അഭിനന്ദനാര്‍ഹമാണ്. 2015ല്‍ 300 വോട്ടിന് എല്‍.ഡി.എഫ് ജയിച്ച തിരുവനന്തപുരം കാരോട് ഗ്രാമപഞ്ചായത്തിലെ കാന്തള്ളൂര്‍ വാര്‍ഡിലെ ബി.ജെ.പിയുടെ വിജയം സി.പി.എം പിന്തുണയോടെയാണെന്ന് സംശയിക്കേണ്ടിയിരിക്കുന്നു. ബി.ജെ.പി 519 വോട്ടുകള്‍ക്ക് ജയിച്ച ഇവിടെ ഇത്തവണ 65 വോട്ടുകള്‍ മാത്രമാണ് എല്‍.ഡി.എഫിന് കിട്ടിയത്.
ഉപതെരഞ്ഞെടുപ്പ് ഫലം ഇടത് ഭരണത്തിനെതിരായ വ്യക്തമായ സൂചനയാണ്. രണ്ടു പ്രളയകാലങ്ങളിലൂടെ കടന്നുപോയ കേരളത്തിലെ സാധാരണ ജനങ്ങള്‍ അനുഭവിച്ച പ്രയാസങ്ങള്‍ ഉള്‍ക്കൊള്ളാനോ പരിഹരിക്കാനോ സര്‍ക്കാരിന് കഴിഞ്ഞില്ല. നിത്യോപയോഗ സാധനങ്ങളുടെ വിലക്കയറ്റം ജനജീവിതം ദുസ്സഹമാക്കിയിരിക്കുകയാണെന്നും അദ്ദേഹം പറഞ്ഞു.