ഇരിക്കൂര്‍: കര്‍ഷക ക്ഷേമ വകുപ്പിന്റെ ജില്ലാതല അവാര്‍ഡുകളില്‍ മിക്കവയും നേടി പ്രദേശത്തെ കര്‍ഷക പാരമ്പര്യത്തിനു അടിവരയിടുകയാണ് കൂടാളി കൃഷിഭവന്‍. മികച്ച കൃഷി അസിസ്റ്റന്റ്, മികച്ച പച്ചക്കറി ക്ലസ്റ്റര്‍, എന്നിവയ്ക്കുള്ള രണ്ടാം സ്ഥാനവും മികച്ച പച്ചക്കറി തോട്ടത്തിനുള്ള ഒന്നാം സ്ഥാനവുമാണ് കൃഷി ഭവന്‍ നേടിയത്. ഇതില്‍ മികച്ച കൃഷി അസിസ്റ്റന്റിനുള്ള രണ്ടാം സ്ഥാനം സന്ധ്യ ജയറാം, പച്ചക്കറി ക്ലസ്റ്ററിനുള്ള രണ്ടാം സ്ഥാനം കോടോളിപ്രം എഗ്രേഡ് പച്ചക്കറി ക്ലസ്റ്റര്‍, എന്നിവരും പച്ചക്കറിത്തോട്ടത്തിനുള്ള അവാര്‍ഡ് കോവൂര്‍ എല്‍.പി സ്‌കൂള്‍ നിടുംകുളവും കരസ്ഥമാക്കി. വിജയികള്‍ക്കുള്ള ട്രോഫികള്‍ കൃഷി മന്ത്രി വി.എസ് സുനില്‍കുമാര്‍ കഴിഞ്ഞ ദിവസം കണ്ണൂരില്‍ വച്ചു നടന്ന ചടങ്ങില്‍ വിതരണം ചെയ്തു. അവാര്‍ഡിനര്‍ഹരായവരെയും അവരെ സഹായിച്ചവരെയും കുടാളി പഞ്ചായത്ത് ഭരണ സമിതി അനുമോദിച്ചു. പ്രസിഡന്റ് പി.പി നൗഫല്‍ അധ്യക്ഷനായി.