അന്തിക്കാട്: പട്ടാളപ്പുഴുവിന്റെ ആക്രമണം തടയുന്നതിനുള്ള കീടനാശിനിയുടെ തുക കര്‍ഷകന്‍ തന്നെ വഹിക്കണമെന്ന കൃഷിവകുപ്പിന്റെ തീരുമാനത്തില്‍ പ്രതിഷേധം വ്യാപകമായി.
ഒരേക്കര്‍ സ്ഥലത്ത് കീടനാശിനി തളിക്കണമെങ്കില്‍ കര്‍ഷകന് 1300 രൂപയോളം ചെലവ് വരുന്നുണ്ട്. കൃഷിയിറക്കുന്നതിന് നല്ലൊരു സംഖ്യ ചെലവായ കര്‍ഷകന് ഇത് തിരിച്ചടിയാണ്.
പാടത്ത് കീടനാശിനി തളിക്കുന്നതിനുള്ള ചെലവ് കര്‍ഷകനും വരമ്പിലും ബണ്ട് റോഡിലും തളിക്കുന്നതിനുള്ള ചെലവ് പടവ് കമ്മിറ്റിയും വഹിക്കണമെന്നാണ് കൃഷി വകുപ്പ് അധികൃതര്‍ പറയുന്നത്. പാടത്ത് കോറാജന്‍ കീടനാശിനിയും വരമ്പിലും ബണ്ട് റോഡിലും ക്യുനാല്‍ഫോസ് കീടനാശിനിയും തളിക്കണമെന്നാണ് കൃഷി വകുപ്പധികൃതര്‍ നിര്‍ദേശം നല്‍കിയിട്ടുള്ളത്. പട്ടാളപ്പുഴുവിനെ കണ്ടെത്തിയ പടവുകളില്‍ മരുന്ന് തളിക്കല്‍ ആരംഭിച്ചിട്ടുണ്ട്. കീടനാശിനി തളിച്ചാലും പുഴുക്കളെ നിയന്ത്രണ വിധേയമാക്കാന്‍ കഴിയുമോയെന്ന ആശങ്കയും കര്‍ഷകര്‍ക്കുണ്ട്. പണ്ടം പണയം വച്ചും അമിത പലിശക്ക് പണം വായ്പയെടുത്തുമാണ് ഭൂരിഭാഗം കര്‍ഷകരും കൃഷിയിറക്കിയിട്ടുള്ളത്.കര്‍ഷകരെ സഹായിക്കേണ്ട കൃഷിവകുപ്പ് കര്‍ഷകരെ ദ്രോഹിക്കുന്ന നടപടിയില്‍ നിന്നും പിന്മാറണമെന്നും അല്ലാത്തപക്ഷം ശക്തമായ സമരപരിപാടികള്‍ ആരംഭിക്കുമെന്നും കര്‍ഷകര്‍ മുന്നറിയിപ്പ് നല്‍കി.