ആലപ്പുഴ : ആലപ്പുഴ മെഡിക്കല്‍ കോളജിന് സമീപമുളള മണപ്പുറം ഫിനാന്‍സില്‍ സ്വര്‍ണം പണയം വെച്ച സ്വര്‍ണം നഷ്ടമായി. അപ്രത്യക്കഷമായ സ്വര്‍ണം തിരക്കിയിറങ്ങിയപ്പോള്‍ മാനേജര്‍ അടിച്ചുമാറ്റിയെന്ന് കമ്പനി .
മാനേജരെ തപ്പി കഴിഞ്ഞ പത്തുദിവസമായി അലയുന്ന ആലപ്പുഴ പഴവീട് സ്വദേശി ശ്രീരാഗത്തില്‍ വേലായുധന്റെ മകന്‍ ഷാബുവിന് ഒടുവില്‍ പോലീസിന്റെ ഭീഷണിയും. തന്റെ സ്വര്‍ണം തിരികെ നല്‍കണമെന്നാവശ്യപ്പെട്ട് ഷാബു ഇന്നലെ സ്ഥാപനത്തിന്റെ മുന്നില്‍ കുടുംബസമേതം എത്തി പ്രതിഷേധിച്ചു. കഴിഞ്ഞ ഏപ്രില്‍ മാസം 29 നായിരുന്നു ഷാബു അഞ്ചര പവന്‍ സ്വര്‍ണം പണയം വെച്ചത്. രണ്ടുഭാഗങ്ങളായാണ് സ്വര്‍ണം പണയം വെച്ചത്. 27.90 ഗ്രാം സ്വര്‍ണം ഒരുഭാഗമായും ബാക്കി സ്വര്‍ണം മറ്റൊരു ഭാഗമായും. മൂന്നു മാസം കൂടുമ്പോള്‍ പണയ മുതല്‍ പലിശയടച്ച് പുതുക്കി വെക്കണമെന്നാണ് വ്യവസ്ഥ. പട്ടണത്തിലെ ചെറു കച്ചവടക്കാരനായ ഷാബു സാമ്പത്തികമായി തകര്‍ന്നപ്പോള്‍ അയല്‍വാസികളായ സുഹൃത്തുകള്‍ സഹായമായി നല്‍കിയ സ്വര്‍ണമാണ് പണയം വെക്കാന്‍ നല്‍കിയത്. ഈ സ്വര്‍ണത്തില്‍ കുറച്ച് തിരിച്ചെടുക്കുവാനും ബാക്കി മറിച്ചുവെക്കുവാനുമാണ് ഷാബു പണയ സ്ഥാപനത്തിലെത്തിയത്. എന്നാല്‍ സ്ഥാപനത്തിലെത്തി രസീത് നീട്ടിയ ഷാബുവിനോട് ജീവനക്കാരില്‍ ചിലര്‍ സ്വര്‍ണം മടക്കിയെടുത്തുക്കൊണ്ടുപോയെന്ന് അറിയിച്ചു. എന്നാല്‍ താന്‍ ഒപ്പിട്ടു നല്‍കാതെ ആരാണ് സ്വര്‍ണം എടുത്തതെന്ന ചോദ്യത്തിന് ജീവനക്കാര്‍ക്ക് ഉത്തരമില്ലായിരുന്നു. സ്ഥാപനത്തില്‍ അത്തരത്തിലൊരു സ്വര്‍ണം ഇല്ലെന്നും അവര്‍ തറപ്പിച്ച് പറഞ്ഞു ഷാബുവിനെ മടക്കി.
എന്നാല്‍ അയല്‍വാസിയായ പ്രവാസിയുടെ ഭാര്യയില്‍നിന്നും കടം വാങ്ങിയ സ്വര്‍ണം തിരിച്ചുകിട്ടാതെ വന്നപ്പോള്‍ ഷാബു വീണ്ടും സ്ഥാപനത്തെ സമീപിച്ചു. പഴയെ മാനേജരെ അടക്കം മുഴുവന്‍ ജീവനക്കാരും സ്ഥലം മാറ്റിയെന്നും ഇപ്പോഴുളളവര്‍ പുതുതായി വന്നതാണെന്നും ജീവനക്കാര്‍ അറിയിച്ചു.ഇതോടെ പഴയ മാനേജരുടെ ഫോണ്‍ നമ്പരില്‍ ബന്ധപ്പെടാന്‍ ശ്രമിച്ച ഷാബുവിന് നിരാശയായിരുന്നു മിച്ചം. പിന്നീട് കണ്ടെത്തിയ മാനേജരെ ചോദ്യം ചെയ്തതില്‍നിന്നും സ്വര്‍ണം മാനേജര്‍ അടിച്ചുമാറ്റിയെന്നും തെളിഞ്ഞു. മാനേജര്‍ സ്വര്‍ണം അടിച്ചുമാറ്റിയെന്ന തെളിഞ്ഞതോടെ കമ്പിനിയുടെ മുതിര്‍ന്ന ഉദ്യോഗസ്ഥര്‍ ഷാബുവിന്റെ പഴവീട്ടിലുളള വസതിയിലെത്തി സ്വര്‍ണ വില മടക്കി തരാമെന്ന് അറിയിച്ചു.
അഞ്ചര പവന് 1.5 ലക്ഷം രൂപയാണ് ഷാബുവിന് സ്ഥാപനം നഷ്ടപരിഹാരമായി നല്‍കാമെന്ന് ഏറ്റത്. എന്നാല്‍ കഴിഞ്ഞ പത്തുദിവസമായി ഷാബുവിനെ വട്ടംകറക്കി സ്ഥാപനം ഒടുവില്‍ കൊടുക്കാമെന്നേറ്റ പണം നല്‍കാതിരിക്കാന്‍ ശ്രമിച്ചു. സ്വര്‍ണം തിരിച്ചുകിട്ടാതെ വന്ന ഷാബു ഇന്നലെ രാവിലെ ആലപ്പുഴ സൗത്ത് പോലീസ് സ്‌റ്റേഷനില്‍ എത്തിയെങ്കിലും എസ് ഐ തനിക്ക് ഭാര്യയ്ക്കും കുഞ്ഞിനും നേരെ കയര്‍ത്തു സംസാരിച്ചതായി പറഞ്ഞു. ഇയാള്‍ പരാതി സ്വീകരിക്കാന്‍ തയ്യാറായില്ലെന്നും ഷാബു പറഞ്ഞു.
സ്വര്‍ണം തിരിച്ചുനല്‍കാന്‍ തയ്യാറാകാതെ മണംപുറം ഫിനാന്‍സ് പൊലീസിനെ ഉപയോഗിച്ച് തന്നെയും കുടംബത്തെയും ഭീഷണിപ്പെടുത്തി പരാതി പിന്‍വലിക്കാന്‍ നോക്കുകയാണെന്നും ഷാബു ആരോപിച്ചു.
സൗത്ത് പോലീസ് എസ് ഐയുടെ ഭീഷണി വിലപ്പോവില്ലെന്നും താന്‍ ജില്ലാ പോലീസ് മേധാവിയെ നേരില്‍ കണ്ട് പരാതി നല്‍കിയിട്ടുണ്ടെന്നും ഷാബു പറഞ്ഞു.