പുനലൂര്‍: ഇടമണ്‍ റെയില്‍വേ സ്റ്റേഷന് കിഴക്കുഭാഗത്ത് അടിപ്പാത പണിതെങ്കിലും ഇതിനോട് ചേര്‍ന്നുളള റോഡ് പുനരുദ്ധരിക്കാത്തത് മൂലം നാട്ടുകാര്‍ ബുദ്ധിമുട്ടുന്നു. ഇടമണ്‍ റെയില്‍വേ സ്റ്റേഷന്റെ മുന്നിലൂടെയുള്ള റെയില്‍വേ ഭൂമിയിലെ റോഡിന്റെ 800 മീറ്ററോളം ഭാഗമാണ് തകര്‍ന്നുതരിപ്പണമായി കിടക്കുന്നത്.
പുനലൂര്‍-ചെങ്കോട്ട റെയില്‍വേ ഗേജ്മാറ്റത്തിന്റെ ഭാഗമായി നാട്ടുകാരും, റെയില്‍വേയും ചേര്‍ന്ന് പണിത റോഡാണിത്. കുണ്ടും, കുഴിയും വെളളക്കെട്ടുമായി കിടക്കുകയാണിപ്പോള്‍. റോഡ് കടന്നുപോകാന്‍ റെയില്‍വേ ട്രാക്കിന് അടിയിലൂടെ റെയില്‍വേ അടിപ്പാത നിര്‍മിച്ച് നല്‍കിയെങ്കിലും നവീകരണം അനന്തമായി നീണ്ടുപോകുകയാണ്.
ദേശിയപാതയിലെ ഇടമണ്‍ സത്രം ജങ്ഷനില്‍ നിന്നാരംഭിച്ച് ഇടമണ്‍ റെയില്‍വേ സ്റ്റേഷന്‍, ചിറ്റാലംകോട്, ഇടമണ്‍ ആയിരവല്ലി ക്ഷേത്രം, തോണിച്ചാല്‍, വാഴവിള, ചെറുതന്നൂര്‍, നെടുംമ്പച്ച, ആനപെട്ടകോങ്കല്‍ തുടങ്ങിയ നിരവധി പ്രദേശങ്ങളിലേക്ക് യാത്രക്കാര്‍ പോകുന്ന ഗ്രാമീണ റോഡാണിത്.
റെയില്‍വേ ഭൂമിയിലൂടെ പോകുന്ന റോഡിന്റെ 800 മീറ്റര്‍ ഭാഗം ഒഴിച്ച് ശേഷിക്കുന്ന സ്ഥലത്തെ പാത ഗതാഗതയോഗ്യമാക്കിയിട്ട് നാളെറെയായി. തകര്‍ന്ന റോഡ് പുനരുദ്ധരിച്ച് നല്‍കണമെന്ന് സ്ഥലം സന്ദര്‍ശിച്ച എന്‍ കെ പ്രേമചന്ദ്രന്‍ എംപി റെയില്‍വേ ഉദ്യോഗസ്ഥരോട് ആവശ്യപ്പെട്ടിരുന്നു.
നടപടി സ്വീകരിക്കുമെന്ന് ഉദ്യോഗസ്ഥര്‍ അന്ന് എംപിക്ക് ഉറപ്പ് നല്‍കിയെങ്കിലും തുടര്‍ നടപടി ഉണ്ടായില്ല. ഇടമണ്‍ പടിഞ്ഞാറ് ശാഖയിലെ ആയിരവല്ലി ക്ഷേത്രത്തിലേക്ക് ഭക്തര്‍ എത്തുന്ന പ്രധാനപാതയാണ് ഇത്.
റോഡിന്റെ തകര്‍ച്ച കാരണം ഓട്ടോറിക്ഷകള്‍ പോലും വരാന്‍ തയ്യാറാകുന്നില്ല, കാര്‍ഷിക മേഖലയായ ചിറ്റാലംകോട്, തോണിച്ചാല്‍,നെടുമ്പച്ച പ്രദേശങ്ങളിലെ കാര്‍ഷിക ഉല്‍പ്പന്നങ്ങള്‍ ദേശീയ പാതയില്‍ എത്തിക്കേണ്ടതും ഈ റോഡ് വഴിയാണ്. റോഡ് അടിയന്തരമായി പുനരുദ്ധരിക്കണമെന്ന് നാട്ടുകാര്‍ ആവശ്യപ്പെട്ടു.