അറവനമുട്ടിക്കൊണ്ടണയുകയായിരുന്നു
ഉമ്മറവാതില്‍ക്ക,ലത്താഴം മുട്ടുകാര്‍
''നേരമായ്, നേരമായ് നിദ്രവിട്ടുണരുവീന്‍
നോമ്പൊന്ന് നോല്‍ക്കുവാന്‍ നേരമായ്, നേരമായ്!''
ഞെട്ടിയുണര്‍ന്നൂ, വെളിച്ചത്തിന്‍കണ്ണുകള്‍
കൊട്ടാരതുല്യമാം മന്ദിരമട്ടുപ്പാവില്‍
കുടിലില്‍ തെളിയുന്നൂ, മണ്ണെണ്ണ വിളക്കുക-
ളവിടെയൊ, നോമ്പിന്ന് നിത്യം വരവേല്‍പാണ്!
കോഴികള്‍ കൂവുന്നു, നാളെ നോമ്പിന്‍സദ്യ-
മേശയിലറുപത്തിയഞ്ചായ് മാറേണ്ടവന്‍.
ഉമിനീരിറക്കാതെ, പകലൊന്നു പോക്കുവാന്‍
ഉതകേണമെങ്കിലൊ, കരുതല്‍ സ്‌റ്റോക്കതുവേണം.
തസ്ബീഹിന്‍ മണികളില്‍ ചേതന നേടീടുന്നൂ
തക്ബീറിന്‍ മന്ത്രമധുരമാം നാദങ്ങള്‍
മുസഹഫ് റിഹയാലില്‍ തുറന്നിരിപ്പാണിന്ന്
ജുഅ്‌സുകളൊന്നൊന്നായ് മറിയുന്നു, മാത്രയില്‍
മസ്ജിദിലാളുകളഞ്ചുനേരം നിത്യം
വന്‍സുജൂദിലാണിപ്പോഴേ പള്ളി തിങ്ങാറുള്ളൂ
യാചകര്‍ പെരുകുന്നു; ദയതന്‍ ഖജനാവ്
ഈയൊരു മാസം മാത്രം, തുറക്കപ്പെടാറുള്ള
അത്തി, മുന്തിരി, കാരയ്ക്കപ്പഴമെല്ലാ-
മന്തിയാവുമ്പോഴെത്തും നോമ്പിനെ മുറിക്കുവാന്‍
പത്തിരി പലതര, മിറച്ചിയും നെയ്‌ച്ചോറും
കിച്ചടിയലീസയും ജീരകക്കഞ്ഞിയും.
അതിഥികള്‍, പ്രമുഖരാമതിഥികളുണ്ടെങ്കിലേ
നോമ്പുസല്‍ക്കാരത്തിന്‍ ഗമ കൈവരാറുള്ളൂ
ചായക്കടകളണിയുന്ന പര്‍ദ്ദകള്‍,
ചാരായക്കടപോലൊളിച്ചുകേറും 'മാന്യര്‍!'
നന്മതന്‍ വിപണന ശാലയിലീ മാസത്തില്‍
റിഡക്ഷന്‍ സെയിലാണ്, ഭോക്താക്കളേറുന്നു.
ഇവിടെ കടപൂട്ടിക്കിടപ്പാണ്, വര്‍ഷത്തി-
ന്നിതര മാസങ്ങളില്‍ ബിസിനസ്ഡള്ളാണ്.
പതിനൊന്നു മാസം വാരിക്കൂട്ടിയ
പൊയ്‌നാണ്യങ്ങള്‍
ഇവിടെ മാറികിട്ടുമെന്ന് വിചാരിപ്പോര്‍
ഇതിന്റെ പലിശയിലൊരു പുരുഷായുസ്
മോക്ഷമായ്തീര്‍ന്നെന്ന് തീര്‍ത്തും വിചാരിപ്പോര്‍
മസ്ജിദില്‍ തള്ളിതിരക്കുന്നു രാപക-
ലില്ലാതെയാത്മാവിന്‍ മോക്ഷമാര്‍ഗം തേടി
കാപട്യമേ, നിങ്ങളറിയുവീ, നല്ലാഹു
കാണ്മത് പുറമല്ല, കരളിന്നകമല്ലൊ-
ഉറക്കം നടിച്ചെന്നും മയങ്ങുമെന്‍ കൂട്ടത്തെ
അറവനമുട്ടിയുണര്‍ത്തുവതെങ്ങനെ?
പാടുകയെങ്കിലുമീയുയിര്‍പ്പാട്ടെന്നും
നിദ്രയിലാണ്ടവരുണരുകീലുണരട്ടെ.