തിരുവനന്തപുരം: മെഡിക്കല്‍ കോളജ് എന്‍ഡോക്രൈനോളജി വിഭാഗത്തിന്റെ കീഴില്‍ പുതിയ ജനറല്‍ എന്‍ഡോക്രൈനോളജി ഒ.പി തുടങ്ങി. രോഗികളുടെ ബാഹുല്യം കണക്കിലെടുത്ത് ആരോഗ്യമന്ത്രിയുടെ പ്രത്യേക നിര്‍ദേശത്തെ തുടര്‍ന്നാണ് ഈ പുതിയ ഒ.പി തുടങ്ങിയത്. ഒ.പി.യില്‍ പുതിയ രോഗികളേയായിരിക്കും പരിശോധിക്കുക. എല്ലാ തിങ്കളാഴ്ചയും രാവിലെ 10 മണി മുതല്‍ ഉച്ചയ്ക്ക് ഒരു മണിവരെയായിരിക്കും ഒ.പി പ്രവര്‍ത്തിക്കുക. ബുധനാഴ്ച തോറും നടന്നുവരുന്ന ജനറല്‍ എന്‍ഡോക്രൈനോളജി ഒ.പിക്കും വെള്ളിയാഴ്ച തോറും രാവിലെ 10.30 മുതല്‍ എസ്.എ.ടി. ആശുപത്രിയില്‍ നടന്നു വരുന്ന റിപ്രൊഡക്ടീവ് എന്‍ഡോക്രൈനോളജി ഒ.പിക്കും അഡോളസന്‍സ് എന്‍ഡോക്രൈനോളജി ഒ.പിക്കും പുറമേയാണ് ഈ മൂന്നാമത്തെ ഒ.പി.
ഹോര്‍മോണ്‍ വ്യതിയാനവുമായി ബന്ധപ്പെട്ടുണ്ടാകുന്ന പ്രമേഹം, തൈറോയിഡ്, അമിത വണ്ണം, അഡ്രീനല്‍ ഗ്രന്ധികള്‍ക്കുണ്ടാകുന്ന പഴുപ്പ്, ആര്‍ത്തവ സംബന്ധമായുണ്ടാകുന്ന പ്രശ്‌നങ്ങള്‍ എന്നീ രോഗങ്ങള്‍ക്ക് സ്‌പെഷ്യാലിറ്റി ചികിത്സ നല്‍കുന്ന വിഭാഗമാണ് എന്‍ഡോക്രൈനോളജി. മെഡിക്കല്‍ കോളജില്‍ ഈ വര്‍ഷം മുതല്‍ ഡി.എം എന്‍ഡോക്രൈനോളജി കോഴ്‌സ് തുടങ്ങാനും പദ്ദതിയുണ്ട്.