പാരിസ്: പാരിസില്‍ സൈനികര്‍ക്കു നേരെ കാറിടിച്ചുകയറ്റിയുണ്ടായ അപകടത്തില്‍ ആറു പേര്‍ക്ക് പരുക്ക്. വടക്കന്‍ പാരിസിലെ ലവല്ലോയിസ് പെരെറ്റിലെ സൈനിക ബാരക്കിനു നേരെയാണ് ആക്രമണം. പ്രതിയെ വെടിവച്ചു വീഴ്ത്തിയ ശേഷം പൊലിസ് അറസ്റ്റ് ചെയ്തു. ഇയാള്‍ക്കും സാരമായി പരുക്കേറ്റു.
ഭീകരാക്രമണമാണെന്ന് സംശയിക്കുന്നതായും വധശ്രമത്തിനു പ്രതിക്കെതിരേ കേസെടുത്തുവെന്നും പാരിസ് പ്രോസിക്യൂട്ടര്‍ പറഞ്ഞു. പ്രതിയെ പിടികൂടാന്‍ ശ്രമിക്കവെയും ഒരു പൊലിസുകാരന് പരുക്കേറ്റു. എ-16 മോട്ടോര്‍വേയിലാണ് ആക്രമണം. പൊര്‍ട്ട് ഓഫ് ബൊളന്‍ഗോയിലെ മര്‍ഖൈസ് ടൗണിനു സമീപത്തുവച്ചാണ് പ്രതിയെ പിടികൂടിയതെന്നാണ് വിവരം.
ബി.എം.ഡബ്ല്യു കാറാണ് ആക്രമണത്തിന് ഉപയോഗിച്ചത്. പരുക്കേറ്റവരില്‍ മൂന്നു സൈനികരുടെ നില ഗുരുതരമാണ്.
എന്നാല്‍ എല്ലാവരും അപകടനില തരണം ചെയ്തുവെന്ന് പ്രതിരോധ മന്ത്രി ഫ്‌ളോറന്‍സ് പേര്‍ളി പറഞ്ഞു. കാറിനു നേരെ പൊലിസ് പലതവണ നിറയൊഴിച്ചു. 30 വയസുകാരനാണ് അറസ്റ്റിലായത്.
ആക്രമണത്തിനു പിന്നിലുള്ള കാരണം വ്യക്തമല്ല. 2015 നവംബറിലെ പാരിസ് ഭീകരാക്രമണത്തിനു പിന്നാലെ പാരിസില്‍ അടിയന്തരാവസ്ഥ പ്രഖ്യാപിച്ചിരുന്നു.
നവംബര്‍ 13 ലെ ഭീകരാക്രമണത്തില്‍ 130 പേരാണ് കൊല്ലപ്പെട്ടത്. തുടര്‍ന്നു നടന്ന ഭീകരാക്രമണങ്ങളിലും മറ്റു 100 പേര്‍ കൊല്ലപ്പെട്ടിട്ടുണ്ട്.