ദുബായ്: ദുബായില്‍ ഇനി ടാക്‌സിക്കായി അഞ്ച് മിനുറ്റില്‍ കൂടുതല്‍ കാത്തിരിക്കേണ്ടി വരില്ല. കരീം ആപ്പ് ഉപയോഗിച്ച് ടാക്‌സി ബുക്ക് ചെയ്യാന്‍ സൗകര്യമാണ് ഇവിടെയൊരുക്കുന്നത്. ഇതുസംബന്ധിച്ച് ദുബായ് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റിയും കരീമും ധാരണാ പത്രത്തില്‍ ഒപ്പുവച്ചു. ആളുകള്‍ക്ക് എളുപ്പം ടാക്‌സി സേവനം ലഭ്യമാകാന്‍ കരീമിന്റെ ഈ സംവിധാനത്തിന് സാധിക്കുമെന്ന് ആര്‍.ടി.എ. ചെയര്‍മാന്‍ മാതര്‍ അല്‍തായര്‍ അറിയിച്ചു.

10,843 ടാക്‌സികളാണ് ഇഹെയിലിന്റെ പരിധിയില്‍ വരുന്നത്. 2019 ഏപ്രിലോടെ സേവനം വ്യാപകമാകും. ലോകത്ത് ആദ്യമായാണ് ഇത്തരത്തില്‍ ഒരു സംവിധാനം ഏര്‍പെടുത്തുന്നത്. ലോകത്തെ വിവിധ ഇഹെയില്‍ കമ്പനികള്‍ ആര്‍.ടി.എ.യുമായി സഹകരിക്കാന്‍ താത്പര്യം പ്രകടിപ്പിച്ചിരുന്നു. കരീമിനെയാണ് തെരഞ്ഞെടുത്തത്. ദുബായിലെ ലിമോസിനുകളുടെ സേവനത്തിനു നേരത്തേ കരീമുമായി ധാരണ ഉണ്ടാക്കിയിരുന്നു. ലോകത്തിന്റെ ഏത് ഭാഗത്തുനിന്നും ദുബായ് ടാക്‌സി ബുക്ക് ചെയ്യാന്‍ ഇഹെയ്‌ലിലൂടെ സാധ്യമാകും. ആര്‍.ടി.എ.യ്ക്കു സ്വന്തമായി ഓണ്‍ലൈന്‍ സംവിധാനം ഉണ്ടെങ്കിലും കുറേക്കാലമായി നവീകരിക്കാന്‍ കഴിഞ്ഞിട്ടില്ല.

പദ്ധതിയുടെ രണ്ടാം ഘട്ടത്തില്‍ ഒരേ റൂട്ടില്‍ പോകുന്ന മറ്റ് യാത്രക്കാരോടൊപ്പം ഷെയര്‍ ടാക്‌സി എന്ന നിലയില്‍ സേവനം ഉപയോഗിക്കാനും സാധിക്കും. ടാക്‌സി നിരക്കുകളില്‍ മാറ്റമുണ്ടാകുകയില്ലെന്നും അധികൃതര്‍ അറിയിച്ചു.