കൊല്ലം: കൊല്ലം തീരത്ത് ഇന്നലെ മത്സ്യ ബന്ധന ബോട്ടിലിടിച്ച വിദേശ കപ്പല്‍ തിരിച്ചറിഞ്ഞതായി നാവിക സേന. ഹോങ്കോങ് രജിസ്‌ട്രേഷനിലുള്ള കപ്പലാണെന്ന് സംശയമുണ്ട്. കപ്പലിന്റെ പേരും രാജ്യവും സ്ഥിരീകരിച്ചിട്ടില്ല.

ബോട്ടിലിടിച്ച ശേഷം നിര്‍ത്താതെ പോയ കപ്പലിനെ നാവികസേന പിന്തുടരുന്നുണ്ട്. കപ്പില്‍ തീരത്തടുപ്പിക്കാന്‍ നാവിക സേന നിര്‍ദേശം നല്‍കിയിട്ടുണ്ട്. എന്നാല്‍ ഇതു കേള്‍ക്കാതെ കപ്പല്‍ ഇപ്പോഴും യാത്ര തുടരുകയാണ്. വേണമെങ്കില്‍ കേന്ദ്രത്തിന്റെ സഹായം തേടുമെന്ന് തീര സംരക്ഷണസേന അറിയിച്ചു. കപ്പല്‍ കൊളംബോ ഭാഗത്തേക്കു നീങ്ങുന്നതയാണ് ലഭിച്ച സൂചനകള്‍.

ഇന്നലെ ഇന്ന് ഉച്ചയ്ക്ക് 12.30നായിരുന്നു കൊല്ലത്ത് മത്സ്യബന്ധനവള്ളത്തില്‍ കപ്പലിടിച്ചത്. ചൂണ്ടക്കാരുടെ വള്ളമാണ് അപകടത്തില്‍പ്പെട്ടത്. തീരത്തുനിന്ന് 39 നോട്ടിക്കല്‍ മൈല്‍ അകലെ അന്താരാഷ്ട്ര കപ്പല്‍ ചാലിലായിരുന്നു സംഭവം. വള്ളത്തിലുണ്ടായിരുന്ന ആറു പേരെയും രക്ഷപ്പെടുത്തി.

വേളാങ്കണ്ണി എന്ന വള്ളമാണ് അപകടത്തില്‍പെട്ടത്. അപകടത്തില്‍ വള്ളം പൂര്‍ണ്ണമായും തകര്‍ന്നു. കതാലിയ എന്നു പേരുള്ള വിദേശ കപ്പലാണ് ഇടിച്ചതെന്നാണ് മത്സ്യത്തൊാഴിലാളികള്‍ നല്‍കിയ സൂചന.

രക്ഷാപ്രവര്‍ത്തനത്തിനായി നാവികസേനയും ഡോണിയര്‍ വിമാനവും ഹെലികോപ്ടറും കൊച്ചിയില്‍നിന്നു കൊല്ലത്തെത്തിയിരുന്നു. 2012ല്‍ കൊല്ലം കടലില്‍ വള്ളത്തില്‍ ഇറ്റാലിയന്‍ കപ്പലിടിച്ച് രണ്ടു മത്സ്യത്തൊഴിലാളികള്‍ക്ക് ജീവന്‍ നഷ്ടപ്പെട്ടിരുന്നു.