ന്യൂഡല്‍ഹി: ഹൈക്കോടതി ഉത്തരവിലൂടെ മെഡിക്കല്‍ പ്രവേശനത്തിനു താല്‍ക്കാലിക അനുമതി നേടിയ രണ്ടു സ്വാശ്രയ മെഡിക്കല്‍ കോളേജുകളുടെ പ്രവേശനനടപടികള്‍ സുപ്രിംകോടതി റദ്ദാക്കി. തൊടുപുഴ അല്‍ അസ്ഹര്‍ കോളജിന് പിന്നലെ ഡി.എം വയനാട്, അടൂര്‍ മൗണ്ട് സിയോണ്‍ എന്നീ സ്ഥാപനങ്ങള്‍ നടത്തിയ എം.ബി.ബി.എസ് പ്രവേശനമാണ് ചീഫ് ജസ്റ്റിസ് ദീപക്മിശ്ര അധ്യക്ഷനായ ബെഞ്ച് റദ്ദാക്കിയത്.
മെഡിക്കല്‍ കൗണ്‍സില്‍ ഓഫ് ഇന്ത്യയുടെ അംഗീകാരം ഇല്ലാത്തതു ചൂണ്ടിക്കാട്ടിയാണ് പ്രവേശനം റദ്ദാക്കിയത്. ഈ മൂന്നു കോളജുകളിലെയും പ്രവേശനത്തിനെതിരേ മെഡിക്കല്‍ കൗണ്‍സില്‍ നല്‍കിയ ഹരജി പരിഗണിച്ചാണ് കോടതി നടപടി.
അംഗീകാരം ഇല്ലാത്ത കോളജുകള്‍ക്ക് പ്രവേശനാനുമതി നല്‍കിയ കേരളാ ഹൈക്കോടതിയുടെ നീക്കം നീതിന്യായ ധാര്‍മികതക്ക് നിരക്കുന്നതല്ലെന്ന് ചീഫ് ജസ്റ്റിസ് വ്യക്തമാക്കി. ഈ കോളജുകളില്‍ പ്രവേശനം ലഭിച്ച വിദ്യാര്‍ഥികളുടെ ഭാവി കണക്കിലെടുക്കണമെന്ന സംസ്ഥാന സര്‍ക്കാരിന്റെ ആവശ്യം തള്ളിയാണ് സുപ്രിംകോടതിയുടെ ഇന്നലത്തെ ഉത്തരവ്.
പ്രവേശനം നേടിയ വിദ്യാര്‍ഥികളുടെ ഭാവിയെ ബാധിക്കുന്ന വിഷയമാണെന്നും പ്രവേശന നടപടിക്ക് അംഗീകാരം നല്‍കണമെന്നും സംസ്ഥാന സര്‍ക്കാരിനു വേണ്ടി ഹാജരായ മുതിര്‍ന്ന അഭിഭാഷകന്‍ മുകുള്‍ റോഹ്ത്തഗി കഴിഞ്ഞദിവസം വാദിച്ചിരുന്നു. എന്നാല്‍, സുപ്രിംകോടതി ഇക്കാര്യം അംഗീകരിച്ചില്ല.
മെഡിക്കല്‍ കൗണ്‍സിലിന്റെ അംഗീകാരം ഇല്ലാതെ മെഡിക്കല്‍ കോളജുകള്‍ക്ക് പ്രവര്‍ത്തിക്കാനാവില്ലെന്നു കോടതി വ്യക്തമാക്കി. പ്രവേശനം നേടിയ വിദ്യാര്‍ഥികള്‍ക്ക് പ്രത്യേക ഹരജിയുമായി കോടതിയെ സമീപിക്കാവുന്നതാണെന്നും കോടതി ചൂണ്ടിക്കാട്ടി.
നേരത്തെ, ഈ മൂന്നു കേളജുകളിലെയും പ്രവേശനം മെഡിക്കല്‍ കൗണ്‍സില്‍ മരവിപ്പിച്ചിരുന്നു. ഇതിനെതിരേ സ്ഥാപനങ്ങള്‍ ഹൈക്കോടതിയെ സമീപിച്ചാണ് താല്‍ക്കാലിക പ്രവേശനാനുമതി നേടിയത്.
എന്നാല്‍ ഹൈക്കോടതി ഇളവുനല്‍കിയത് ചോദ്യംചെയ്തു മെഡിക്കല്‍ കൗണ്‍സില്‍ സുപ്രിംകോടതിയെ സമീപിക്കുകയായിരുന്നു.