കാട്ടാക്കട: കനത്ത മഴ. തലസ്ഥാനജില്ലയിലെ ഏക ജലസേചന അണക്കെട്ടായ നെയ്യാര്‍ അണക്കെട്ട് തുറന്നു. മണിക്കൂറുകള്‍ നീണ്ട കനത്ത മഴകാരണം വെള്ളം നിറഞ്ഞതിനെ തുടര്‍ന്നാണ് ഇന്നലെ വൈകിട്ട് നാലോടെ അണക്കെട്ട് തുറന്നത്.
അണക്കെട്ടിന്റെ നാല് ഷട്ടറുകളും ഏഴ് ഇഞ്ചോളം ഉയര്‍ത്തിയിട്ടുണ്ട്. കനത്ത ജലപ്രവാഹം കാരണം പരമാവധി ജലനിരപ്പിനും മുകളില്‍ എത്തിയതോടെയാണ് അണക്കെട്ട് തുറക്കാന്‍ തീരുമാനിച്ചത്. കഴിഞ്ഞ മൂന്ന് ദിവസമായി തുടങ്ങിയ മഴക്ക് ഇതു വരെ വരെ ശമനമുണ്ടായിട്ടില്ല.
ജലനിരപ്പ് വീണ്ടും ഉയര്‍ന്നുകൊണ്ടിരിക്കുന്നതിനാല്‍ ഷട്ടറുകള്‍ അധികമായി ഉയര്‍ത്തേണ്ടി വരുമെന്ന് അധികൃതര്‍ അറിയിച്ചു. കൂടുതല്‍ വെള്ളം എത്തിയാല്‍ ഡാമിന്റെ കനാലുകള്‍ വഴിയും വെള്ളം തുറന്നുവിടും. ഒരു മണിക്കൂറില്‍ 26 സെ.മീറ്റര്‍ വീതം വെള്ളം പൊങ്ങികൊണ്ടിരിക്കുകയാണ്. മുന്‍പ് സമയത്തിന് ഷട്ടറുകള്‍ തുറക്കാന്‍ കഴിഞ്ഞിരുന്നില്ല. അതിനാല്‍ ഇക്കുറി അധികൃതര്‍ ജാഗരൂകരായാണ് നിന്നത്. കലക്ടറുടെ നിര്‍ദേശം കിട്ടിയതോടെ ഡാം തുറക്കുകയായിരുന്നു. ഡാമില്‍ 84. 700മീറ്റര്‍ ജലമാണ് ഇപ്പോഴുള്ളത്.
പരമാവധി നിരപ്പ് 84.750 മീറ്റര്‍ ആണ്. ജലനിരപ്പ് 84.500 കഴിഞ്ഞതോടെ വെള്ളം ഏതാണ്ട് നിറകവിയുമെന്ന ഘട്ടത്തിലായി. തുടര്‍ന്നാണ് ഡാമിന്റെ നാല് ഷട്ടറുകളും തല്‍ക്കാലം ഒരിഞ്ച് തുറന്നത്. എന്നാല്‍ അണക്കെട്ടില്‍ വീണ്ടും ജലനിരപ്പ് ഉയര്‍ന്നതിനാല്‍ പിന്നീട് ഷട്ടറുകള്‍ അഞ്ചാക്കി ഉയര്‍ത്തി. അരമണിക്കൂറിനുശേഷം ഷട്ടറുകള്‍ ഏഴു ഇഞ്ച് വീതം ഉയര്‍ത്തി. ഡാമിലേക്ക് നീരൊഴുക്കുന്ന നെയ്യാര്‍, കല്ലാര്‍, മുല്ലയാര്‍ തുടങ്ങിയ വലിയ നദികളും മണിയങ്കത്തോട്, കാരക്കുടി, അഞ്ചുനാഴിത്തോട്, കാരയാര്‍ തുടങ്ങിയ ഇരുപതോളം ചെറുനദികളിലും കനത്ത വെള്ളമാണുള്ളത്. വനത്തില്‍ നല്ല മഴ ചെയ്തതിനെ തുടര്‍ന്നാണ് നല്ല നീരൊഴുക്കുള്ളത് ആറിന്റെ ഇരു കരകളിലും താമസിക്കുന്നവര്‍ ജാഗ്രത പാലിക്കണമെന്ന് അധികൃതര്‍ അറിയിച്ചു. അണക്കെട്ട് നിറഞ്ഞതോടെ ക്യാച്ച്‌മെന്റ് ഏരിയയില്‍ വെള്ളം കയറി.
ഇവിടെ താമസിക്കുന്നവരുടെ വീടുകളില്‍ അടുക്കള വരെ വെള്ളം കയറി. പലരും താമസം മാറ്റിയിട്ടുണ്ട്. ഇവിടുത്തെ കൃഷിയിടങ്ങളിലും വെള്ളം കയറിയിട്ടുണ്ട്. വനത്തില്‍ കനത്ത മഴ പെയ്യുന്നതിനാല്‍ ആദിവാസികളും ദുരിതത്തിലാണ്. ഇവര്‍ക്ക് പുറത്തിറങ്ങാന്‍ പോലും കഴിയുന്നില്ല. കാട്ടുമൃഗ ഭീഷണിയുമുണ്ട്. പലരുടേയും വീട്ടുമൃഗങ്ങള്‍ ഒലിച്ചുപോയതായി പരാതിപ്പെട്ടിട്ടുണ്ട്. അഗസ്ത്യമലനിരകളില്‍ കനത്ത മഴ വന്‍ നാശനഷ്ടമുണ്ടാക്കി. പുറം നാടുമായി ബന്ധപ്പെടേണ്ട പാലം ഒലിച്ചുപോയി. വനത്തിലെ കാണിക്കാര്‍ ഒറ്റപ്പെട്ട നിലയിലുമായി.