മക്ക: സഊദിയുമായി ഹജ്ജ് കരാര്‍ ഒപ്പുവയ്ക്കാത്ത ഇറാനില്‍ നിന്നും മറ്റു രാജ്യങ്ങള്‍ വഴി ഹാജിമാര്‍ സഊദിയിലേക്ക് വരുമെന്ന് സഊദി ഹജ്ജ്-ഉംറ മന്ത്രാലയങ്ങള്‍ വ്യക്തമാക്കി. ഇത്തരത്തില്‍ രാജ്യത്തെത്തുന്ന ഇറാന്‍ ഹാജിമാരെ ആവേശപൂര്‍വം സ്വീകരിക്കുമെന്നും ഹജ്ജ്-ഉംറ മന്ത്രാലയം പറഞ്ഞു. സഊദിയുടെ നയതന്ത്രബന്ധം ഇടഞ്ഞതിനെ തുടര്‍ന്നാണ് ഇറാന്‍ ഭരണകൂടം സഊദിയുമായി ഹജ്ജ് കരാര്‍ ഒപ്പുവയ്ക്കാന്‍ വിസമ്മതിച്ചത്. എന്നാല്‍, മറ്റേതു രാജ്യങ്ങള്‍ വഴിയും പുണ്യഭൂമിയിലെത്തുന്ന ഇറാന്‍ ഹാജിമാരെ തടയുകയില്ലെന്നു സഊദി വ്യക്തമാക്കുകയായിരുന്നു.

എന്നാല്‍, ഏതു രാജ്യങ്ങളില്‍ നിന്നാണോ ഇറാന്‍ ഹാജിമാര്‍ വരുന്നത് ആ രാജ്യങ്ങളുടെ തീര്‍ത്ഥാടകര്‍ക്ക് ഒരുക്കുന്ന ക്രമീകരണങ്ങളുടെ ഭാഗമായി മാത്രമേ ഇറാന്‍ ഹാജിമാരെയും അധികൃതര്‍ സ്വീകരിക്കുകയുള്ളൂ. ഹജ്ജ് തീര്‍ത്ഥാടകരോട് സഊദി ഭരണ കൂടം വിവേചനം കാണിക്കുകയില്ലെന്നതിന്റെ തെളിവാണ് ഇറാന്‍ ഹാജിമാരെ സ്വീകരിക്കുന്നതെന്ന് അധികൃതര്‍ പറഞ്ഞു.
അതേ സമയം, പുണ്യഭൂമിയിലേക്കുള്ള ഹാജിമാരുടെ ഒഴുക്ക് തുടരുകയാണ്. ജിദ്ദ അന്താരാഷ്ട്ര വിമാനത്താവളം, മദീന വിമാനത്താവളം വഴിയാണ് ഭൂരിപക്ഷം ഹാജിമാരും രാജ്യത്തേക്ക് വരുന്നത്. ഒന്നര ലക്ഷത്തോളം ഹാജിമാരാണ് ഇത് വരെയായി ഈ രണ്ടു കേന്ദ്രങ്ങള്‍ വഴി പുണ്യഭൂമിയിലെത്തിയത്. ജിദ്ദ വിമാനത്താവളം വഴി എട്ടര ലക്ഷം തീര്‍ത്ഥാടകരും, മദീന വിമാനത്താവളം വഴി അഞ്ചര ലക്ഷം തീര്‍ത്ഥാടകരുമാണ് ഈ വര്‍ഷം എത്തിച്ചേരുക.

മദീനയില്‍ ഏറ്റവും കൂടുതല്‍ ഹജ്ജ് വിമാന സര്‍വ്വീസ് ദുല്‍ഖഅദ് 15 നാണ്. അന്നേ ദിവസം 99 ഹജ്ജ് വിമാന സര്‍വീസുകളാണ് ഇവിടെ എത്തിച്ചേരുക. ഹാജിമാരുടെ ഒഴുക്ക് ശക്തമാകുന്ന അവസരത്തില്‍ അതിനു അനുയോജ്യമായ സംവിധാനങ്ങളാണ് വിമാനത്താവളങ്ങളില്‍ സഊദി ഭരണകൂടം സ്വീകരിച്ചിരിക്കുന്നത്. കഴിഞ്ഞ വര്‍ഷത്തെ അപേക്ഷിച്ച ഇത്തവണ മദീനയില്‍ വിമാന സര്‍വീസുകള്‍ നാലു ശതമാനം വര്‍ധനവുണ്ടാകും. ദുല്‍ഹജ്ജ് നാലിനാണ് ഇരു വിമാനത്താവളങ്ങളിലും അവസാന ഹജ്ജ് വിമാന സര്‍വീസ്.