ചണ്ഡീഗഢ്: ഹരിയാനയില്‍ ബോക്‌സിങ് മെഡല്‍ ജേതാക്കള്‍ക്ക് വിചിത്ര പാരിതോഷികവുമായി സര്‍ക്കാര്‍. ലോക യൂത്ത് വനിതാ ബോക്‌സിങ് ചാമ്പ്യന്‍ഷിപ്പിലെ മെഡല്‍ ജേതാക്കള്‍ക്ക് പശുക്കളെയാണ് സര്‍ക്കാര്‍ സമ്മാനമായി പ്രഖ്യാപിച്ചിരിക്കുന്നത്. ഹരിയാന കൃഷിമന്ത്രി ഓംപ്രകാശ് ധന്‍കറാണ് ഈ വിചിത്ര സമ്മാനം കായിക താരങ്ങള്‍ക്കായി പ്രഖ്യാപിച്ചത്.

പശുവിനെ പാരിതോഷികമായി തെരഞ്ഞെടുത്തതിനെ മന്ത്രി ന്യായീകരിച്ചത് ഇപ്രകാരം. പശുവിനെ സമ്മാനമായി ലഭിക്കുന്നതിലൂടെ താരങ്ങള്‍ക്ക് ഗുണമേന്‍മയുള്ള പാല്‍ ലഭിക്കും. അങ്ങനെ അവര്‍ക്ക് സൗന്ദര്യം മാത്രമല്ല, ബുദ്ധിയും ലഭിക്കുമെന്നാണ് മന്ത്രിയുടെ നിലപാട്.

എരുമയുടെ പാലിനേക്കാള്‍ കൊഴുപ്പ് കുറവുള്ളത് പശുവിന്റെ പാലിനാണ്. എരുമയേക്കാള്‍ ഊര്‍ജമുള്ളത് പശുവിനാണ്. ശക്തി വേണമെങ്കില്‍ എരുമയുടെ പാലും ബുദ്ധിയും ഭംഗിയും വേണമെങ്കില്‍ പശുവിന്റെ പാലും കുടിക്കണമെന്നും മന്ത്രി അഭിപ്രായപ്പെട്ടു.

നവംബറില്‍ ഗുവാഹത്തിയില്‍ നടന്ന ബോക്‌സിങ് ചാമ്പ്യന്‍ഷിപ്പില്‍ ഹരിയാന സ്വദേശികളായ നീതു, സാക്ഷി, ജോതി, ശശി എന്നിവരാണ് വിവിധ വിഭാഗങ്ങളിലായി സ്വര്‍ണമടക്കം മെഡലുകള്‍ നേടിയിരിക്കുന്നത്. ഇവര്‍ക്കാണ് സര്‍ക്കാര്‍ വക പശുവിനെ സമ്മാനമായി പ്രഖ്യാപിച്ചിരിക്കുന്നത്.