റേഷന്‍ കടകളുടെ പ്രവര്‍ത്തന സമയത്തില്‍ മാറ്റം; വെള്ളിയാഴ്ച്ച അവധി

തിരുവനന്തപുരം: സെര്‍വര്‍ ഓവര്‍ലോഡ് ഒഴിവാക്കുന്നതിനും റേഷന്‍ വിതരണം ത്വരിതപ്പെടുത്തുന്നതിനും സംസ്ഥാനത്തെ റേഷന്‍ കടകളുടെ പ്രവര്‍ത്തന സമയത്തില്‍ പ്രത്യേക ക്രമീകരണം ഏര്‍പ്പെടുത്തി. ഇന്ന് മുതല്‍ ഒന്‍പതാം തീയതിവരെ ഏഴ് ജില്ലകളില്‍ രാവിലേയും ഏഴ് ജില്ലകളില്‍ വൈകീട്ടുമാണ് പ്രവര്‍ത്തനം ക്രമീകരിച്ചിരിക്കുന്നത്. സെര്‍വര്‍ലോഡ് ക്രമീകരിക്കുന്നതിനായാണ് നടപടി. ഈ ദിവസങ്ങളില്‍ മസ്റ്ററിങ്ങും റേഷന്‍ വിതരണവും ഒരേ സമയം നടക്കും. രാവിലെ പ്രവര്‍ത്തിക്കുന്ന റേഷന്‍ കടകളുടെ സമയം രാവിലെ എട്ട് മുതല്‍ ഉച്ചയ്ക്ക് ഒന്ന് വരെയും ഉച്ചയ്ക്ക് ശേഷം പ്രവര്‍ത്തിക്കുന്ന റേഷന്‍ കടകളുടെ സമയം ഉച്ചയ്ക്ക് രണ്ട് മുതല്‍ ഏഴ് വരെയുമാണ്. വെള്ളിയാഴ്ച ശിവരാത്രിയോടനുബന്ധിച്ച് റേഷന്‍ കടകള്‍ക്ക് അവധിയായിരിക്കും.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില്‍ ഇന്നും ഏഴിനും രാവിലെയും നാളെയും ഒമ്പതിനും ഉച്ചയ്ക്കുശേഷവും പ്രവര്‍ത്തിക്കും. തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ ആറിനും ഒമ്പതിനും രാവിലേയും ഇന്നും ഏഴിനും ഉച്ചയ്ക്കുശഷവും തുറന്നു പ്രവര്‍ത്തിക്കും.