മുസ്‌ലിം നേതാക്കൾക്കെതിരേ കേസെടുക്കണമെന്നും ആവശ്യം
സുപ്രിംകോടതിയിൽ ഹരജി നൽകിയത് ഹിന്ദുസേനാ നേതാവ്

ന്യൂഡൽഹി
ഹരിദ്വാറിലെയും ഡൽഹിയിലെയും ധർമ സൻസദിൽ മുസ് ലിംകൾക്കെതിരേ വംശഹത്യാ ആഹ്വാനവും കൊലവിളിയും നടത്തിയ തീവ്രഹിന്ദുത്വവാദികളായ യതി നരസിംഹാനന്ദയടക്കമുള്ളവർക്കെതിരേ കേസെടുക്കുന്നത് തടയണമെന്നാവശ്യപ്പെട്ട് സുപ്രിംകോടതിയിൽ ഇടപെടൽ ഹരജി.

ഹിന്ദുസേനാ ദേശീയ പ്രസിഡൻ്റ് വിഷ്ണു ഗുപ്തയാണ് ഹരജി നൽകിയത്. വിവിധ മുസ് ലിം രാഷ്ട്രീയ-സംഘടനാ നേതാക്കളായ അസദുദ്ദീൻ ഉവൈസി, തൗഖീർ റാസ, സാജിദ് റാഷിദി, അമാനത്തുല്ല ഖാൻ, വാരിസ് പത്താൻ എന്നിവർക്കെതിരേ കേസെടുക്കണമെന്നും ഹരജിയിൽ ആവശ്യപ്പെട്ടു.

ഹരിദ്വാറിലെയും ഡൽഹിയിലെയും മുസ് ലിം വംശഹത്യാ ആഹ്വാനങ്ങൾക്കെതിരേ മാധ്യമപ്രവർത്തകൻ ഖുർബാൻ അലി, പട്‌ന ഹൈക്കോടതി മുൻ ജഡ്ജി അഞ്ജനാ പ്രകാശ് എന്നിവർ സമർപ്പിച്ച ഹരജികൾ ചീഫ് ജസ്റ്റിസ് എൻ.വി രമണ, ജസ്റ്റിസുമാരായ സൂര്യകാന്ത്, ഹിമാ കോഹ് ലി എന്നിവരടങ്ങിയ ബെഞ്ചിൻ്റെ പരിഗണനയിലുണ്ട്. ഈ കേസിലേക്കാണ് ഹിന്ദുസേനാ നേതാവ് ഇടപെടൽ ഹരജി സമർപ്പിച്ചത്.
ഹിന്ദുക്കൾ നടത്തിയ ധർമ സൻസദിലെ കാര്യങ്ങളിൽ എതിർപ്പുന്നയിക്കാൻ മുസ് ലിമായ ഖുർബാൻ അലിക്ക് അധികാരമില്ലെന്ന് ഹരജിയിൽ പറയുന്നു. ഹിന്ദു ആത്മീയ നേതാക്കളെ വിവാദത്തിൽ കുടുക്കാൻ ശ്രമിക്കുകയാണ്. ധർമ സൻസദ് നടത്തിയ ഹിന്ദു ആത്മീയ നേതാക്കൾ ഏതെങ്കിലും മതവിഭാഗത്തെയോ വിശ്വാസത്തെയോ മോശമായി കാണുന്നവരല്ല. ഹിന്ദു സംസ്‌കാരത്തെയും നാഗരികതയെയും ചോദ്യം ചെയ്തവർക്ക് മറുപടി നൽകുക മാത്രമാണ് ധർമ സൻസദിലുണ്ടായത്. അതിനെ വിദ്വേഷ പ്രസംഗമായി കണക്കാക്കരുത്. എല്ലാ മതവിഭാഗത്തിൽപ്പെട്ടവർക്കും ഭരണഘടന തുല്യത ഉറപ്പുവരുത്തുന്നുണ്ടെന്നും ഹിന്ദുസേനാ നേതാവ് ഹരജിയിൽ ചൂണ്ടിക്കാട്ടുന്നു. മുസ് ലിംകൾക്ക് അനുകൂലമായി സംസാരിക്കുന്നുവെന്നാരോപിച്ച് 2011ൽ അഭിഭാഷകൻ പ്രശാന്ത് ഭൂഷണെ ഓഫീസിൽക്കയറി മർദിച്ചയാളാണ് ഹരജിക്കാരനായ ഹിന്ദുസേനാ ദേശീയ പ്രസിഡൻ്റ് വിഷ്ണു ഗുപ്ത.