ഡല്‍ഹി: ജമ്മു കശ്മീരിന് അനുയോജ്യ സമയത്ത് സംസ്ഥാന പദവി തിരിച്ചുനല്‍കുമെന്ന് കേന്ദ്ര ആഭ്യന്തര മന്ത്രി അമിത് ഷാ. ലോക്‌സഭയില്‍ ജമ്മുകശ്മീരിന്റെ പുനഃക്രമീകരണത്തിനുള്ള ഭേദഗതി ബില്‍ അവതരിപ്പിച്ച് സംസാരിക്കുകയായിരുന്നു അദ്ദേഹം. തിങ്കളാഴ്ച ജമ്മുകശ്മീരിന്റെ സംസ്ഥാന പദവി തിരികെ ലഭിക്കുമെന്ന് കോണ്‍ഗ്രസ്‌നേതാവ് ഗുലാം നബി ആസാദ് പറഞ്ഞിരുന്നു. ഇതിനി പിന്നാലെയാണ് അമിത് ഷായുടെ വിശദീകരണം. ആര്‍ട്ടിക്കിള്‍ 370 പിന്‍വലിച്ചതിനു ശേഷം ജമ്മു കശ്മിരിലുണ്ടായ വികസന പ്രവര്‍ത്തനങ്ങളെ കുറിച്ച് സംസാരിക്കവെ അമിത് ഷാ കോണ്‍ഗ്രസിനെതിരെ ആഞ്ഞടിച്ചു.
ആര്‍ട്ടിക്കിള്‍ 370 പിന്‍വലിച്ച സമയം ഞങ്ങള്‍ നല്‍കിയ വാഗ്ദാനങ്ങളില്‍ എന്ത് ചെയ്തുവെന്ന് ഞങ്ങളോട് ചോദിക്കുന്നുണ്ട്. ആര്‍ട്ടിക്കിള്‍ 370 പിന്‍വലിച്ചിട്ട് പതിനേഴു മാസമേ ആയിട്ടുള്ളൂ, എന്നിട്ടും നിങ്ങള്‍ അതിന്റെ കണക്ക് ചോദിക്കുന്നു.'നിങ്ങള്‍ എഴുപത് വര്‍ഷം ചെയ്തതിന്റെ കണക്ക് കൊണ്ട് വന്നിട്ടുണ്ടോ? നിങ്ങള്‍ ശരിയായ രീതിയില്‍ പ്രവര്‍ത്തിച്ചിരുന്നെങ്കില്‍ ഇങ്ങനെ ചോദിക്കില്ലായിരുന്നുവെന്നും എല്ലാത്തിന്റെയും കണക്ക് തരാന്‍ തനിക്കൊരെതിര്‍പ്പുമില്ലെന്നും തലമുറകളോളം ഭരിക്കാന്‍ അവസരം ലഭിച്ചവര്‍ക്ക് കണക്ക് ചോദിക്കാന്‍ അവകാശമുണ്ടോയെന്നും അമിതാഷ് ചോദിച്ചു.