തേഞ്ഞിപ്പലം: ചേളാരി -മാതാപുഴ റോഡ് പലയിടത്തും പൊട്ടിപൊളിഞ്ഞു ചെറുതും വലുതുമായ കുഴികള്‍ രൂപാന്തരപ്പെട്ടതോടെ ഇതുവഴിയുള്ള യാത്ര ദുഷ്‌കരമായി. ചേളാരി വാട്ടര്‍ അതോറിറ്റിക്ക് സമീപം റോഡ് പൊളിഞ്ഞുണ്ടായ കുഴിയാണ് ഇതില്‍ യാത്രക്കാരെ ഏറെ അലട്ടുന്നത്. ഇരുചക്രവാഹനങ്ങള്‍ക്കാണു കുഴി കൂടുതല്‍ പ്രയാസം സൃഷ്ടിക്കുന്നത്. വാഹനങ്ങള്‍ കുഴിയില്‍ വീഴാതിരിക്കാന്‍ പെട്ടെന്നു വെട്ടിച്ചു മാറ്റുന്നത് അപകടത്തിനു കാരണമാകുന്നു.
മാതാപുഴ പാലം യാത്രയ്ക്കായി തുറന്നു കൊടുത്തതോടെ ഇതുവഴിയുള്ള യാത്രക്കാരുടെ എണ്ണവും വര്‍ധിച്ചു. ചേളാരിയില്‍ നിന്നും വള്ളിക്കുന്നു റെയില്‍വെ സ്‌റ്റേഷനിലേക്കും മറ്റുമായി ദിനേന നൂറുകണക്കിനു വാഹനങ്ങള്‍ കടന്നുപോകുന്ന റോഡാണിത്. കൂടാതെ ചേളാരിയില്‍ നിന്നും ചെനക്കലങ്ങാടി, കൊളത്തോട്, അരീപാറ, കടക്കാട്ടുപാറ, കണ്ടംകുളങ്ങര പ്രദേശങ്ങളിലേക്കുള്ള യാത്രക്കാരും ഈ റോഡിനെയാണ് ആശ്രയിക്കുന്നത്. മഴ പെയ്താല്‍ റോഡിലെ കുഴികളില്‍ വെള്ളം കെട്ടി നില്‍ക്കുന്നതു റോഡിന്റെ തകര്‍ച്ചയ്ക്ക് ആക്കം കൂട്ടും. മഴമാറിയ സാഹചര്യത്തില്‍ അറ്റകുറ്റപ്പണി നടത്തിയാല്‍ റോഡിനെ സംരക്ഷിക്കാനും ദുരിത യാത്രയ്ക്ക് അറുതി വരുത്താനുമാകും.