കൊച്ചി: മഹാരാജാസ് കോളജില്‍ കെ.എസ്.യു പ്രവര്‍ത്തകന് നേരേ എസ.്എഫ്.ഐ ആക്രമണം. മൂന്നാം വര്‍ഷ ബികോം വിദ്യാര്‍ത്ഥിയും യൂണിയന്‍ പ്രതിനിധിയുമായ അഫാമിനെയാണ് ഇന്നലെ രാത്രി ആക്രമിച്ചത്. സംഭവത്തില്‍ എസ്.എഫ്.ഐ നേതാവ് നന്ദകുമാര്‍ അടക്കം 8 എസ.്എഫ്.ഐ പ്രവര്‍ത്തകര്‍ക്കെതിരെ പൊലിസ് കേസെടുത്തു.

ഇന്നലെ രാത്രി മഹാരാജാസ് കോളജ് ഹോസ്റ്റലിന് സമീപം ചായ കുടിക്കാന്‍ പോയ കെ.എസ.്‌യു പ്രവര്‍ത്തകനെ ബൈക്കിലെത്തിയ എസ്.എഫ്.ഐ പ്രവര്‍ത്തകര്‍ ക്രൂരമായി ആക്രമിക്കുകയായിരുന്നു. കത്തികൊണ്ട് മുഖത്ത് പരുക്കേല്‍പ്പിക്കുകയും ഹോളോബ്രിക്‌സ് ഉപയോഗിച്ച് ശരീരമാസകലം അടിച്ച് പരുക്കേല്‍പ്പിക്കുകയും ചെയ്‌തെന്നാണ് അഫാം പൊലിസിന് നല്‍കിയ മൊഴി.

അപസ്മാരം വന്ന് നിലത്ത് വീണിട്ടും മര്‍ദനം തുടര്‍ന്നു. കോളജ് യൂണിയന്‍ തെരഞ്ഞെടുപ്പില്‍ കെ.എസ്.യു പ്രതിനിധിയായി മത്സരിച്ച് വിജയിച്ചത് മുതല്‍ തന്നോട് എസ്.എഫ്.ഐ പ്രവര്‍ത്തകര്‍ക്ക് വൈരാഗ്യമുണ്ടായിരുന്നുവെന്നാണ് വിദ്യാര്‍ത്ഥി പറയുന്നത്. 

എസ്.എഫ്.ഐ നേതാവ് നന്ദകുമാര്‍, അര്‍ജ്ജുന്‍ അടക്കമുള്ളവരാണ് ആക്രമണത്തിന് നേതൃത്വം കൊടുത്തതെന്ന അഫാമിന്റെ മൊഴിയുടെ അടിസ്ഥാനത്തില്‍ നന്ദകുമാറിനെ ഒന്നാം പ്രതിയാക്കിയും മറ്റു 8 പേര്‍ക്കെതിരെ വധശ്രമം ഉള്‍പ്പെടെയുള്ള വകുപ്പുകള്‍ ചേര്‍ത്തും പൊലിസ് കേസെടുത്തു.