ഗുണ്ടാനേതാക്കളുടെ വിരുന്നില്‍ പങ്കെടുത്ത ഡിവൈഎസ്പി എം.ജി. സാബുവിനെ സസ്‌പെന്‍ഡ് ചെയ്യാന്‍ മുഖ്യമന്ത്രി പിണറായി വിജയന്‍ പൊലീസ് മേധാവിക്ക് നിര്‍ദേശം നല്‍കി. ആലപ്പുഴ ക്രൈം ബ്രാഞ്ച് ഡിവൈഎസ്പിയാണ് എം.ജി. സാബു. ഈ മാസം 31ന്  വിരമിക്കാനിരിക്കെയാണ് സാബുവിനെതിരെ നടപടി. ഡിവൈഎസ്പിക്കൊപ്പം മറ്റ് രണ്ടു പൊലീസുകാരെക്കൂടി വിരുന്നില്‍ പങ്കെടുത്തതിന് സസ്പെന്‍ഡ് ചെയ്തിട്ടുണ്ട്. 

ഗുണ്ടകളെ അമര്‍ച്ച ചെയ്യാനുള്ള  'ഓപറേഷന്‍ ആഗ്' നടക്കുന്നതിനിടെയാണ് പൊലീസുകാര്‍ വിരുന്നിനെത്തിയത്. സംശയാസ്പദമായ രീതിയില്‍ ഗുണ്ടാ നേതാവിന്റെ വീട്ടില്‍ ആളെത്തിയതറിഞ്ഞ് അങ്കമാലി പൊലീസ് റെയ്ഡ് നടത്തിയപ്പോഴാണ് ഡിവൈഎസ്പിയും പൊലീസുകാരും പിടിയിലാവുന്നത്. ഇവര്‍ക്കെതിരായ റിപ്പോര്‍ട്ട് മേലുദ്യോഗസ്ഥര്‍ക്ക് സമര്‍പ്പിച്ചിരുന്നു.