കോട്ടയം: ജീവനുതുല്യം സ്‌നേഹിച്ച ആൾക്കൂട്ടത്തെയും പുതുപ്പള്ളിയെയും തനിച്ചാക്കി ഉമ്മൻ ചാണ്ടി വിട പറഞ്ഞിട്ട് ഇന്ന് ഒരു വർഷം. തിരക്കിയെത്തുന്നതും കാത്തുനിൽക്കുന്നതുമായ ജനക്കൂട്ടമായിരുന്നു കോൺഗ്രസ് രാഷ്ട്രീയത്തിലെ ഒ.സി എന്ന ഉമ്മൻ ചാണ്ടിയുടെ എന്നത്തെയും കരുത്തും സമ്പാദ്യവും. ജനതയാകെ ഒരിക്കലും നഷ്ടമാകരുതേയെന്ന് അകമഴിഞ്ഞാഗ്രഹിച്ച സ്‌നേഹവും കരുതലുമായിരുന്നു അദ്ദേഹം. അത് പലവുരു ഉറപ്പിക്കുന്നതായിരുന്നു അദ്ദേഹമില്ലാതെപോയ ഒരു വർഷം.

ഉമ്മൻ ചാണ്ടിയുടെ ഭൗതിക ശരീരം അടക്കിയ പുതുപ്പള്ളി സെന്റ് ജോർജ് ഓർത്തഡോക്‌സ് വലിയ പള്ളിയിലെ പ്രത്യേക കല്ലറയിലേക്ക് ഇന്നും തുടരുന്ന ജനപ്രവാഹം അത് അടിവരയിടുന്നു. ഉമ്മൻ ചാണ്ടിയുടെ സ്‌നേഹ സഹായങ്ങൾ സ്വീകരിച്ചവർ മുതൽ ഒരിക്കൽപോലും നേരിൽ കാണാത്തവർവരെ അക്കൂട്ടത്തിലുണ്ട്. ജീവിത കാലത്തെപ്പോലെ മരണാനന്തരവും പ്രിയ നേതാവ് തങ്ങളെ കാക്കുമെന്ന വിശ്വസിക്കുന്നവരും അതിൽപ്പെടും.

അധികാരം ഉള്ളപ്പോഴും ഇല്ലാത്തപ്പോഴും സാധാരണക്കാരനു വേണ്ടി നിലകൊണ്ട ഭരണാധികാരിയും ജനപ്രതിനിധിയും ആയിരുന്നു അദ്ദേഹം. മരണംവരെ പുതുപ്പള്ളിയെ നെഞ്ചേറ്റിയ പ്രിയ കുഞ്ഞൂഞ്ഞിന് 1970 മുതൽ അര നൂറ്റാണ്ടിനു മേൽ വിശ്വാസത്തിന്റെ പൂച്ചെണ്ടേൽപിച്ചാണ് നാട് ചേർത്തുപിടിച്ചത്. പിന്നീട് മകൻ ചാണ്ടി ഉമ്മനെ വിജയ തീരത്തെത്തിച്ചും കൂടെയുണ്ടെന്ന് നാട് ഉറക്കെപ്പറഞ്ഞു.

കഴിഞ്ഞ വർഷം ജൂലൈ 18ന് ബംഗളൂരുവിൽ ചികിത്സയിലിരിക്കെ 73 -ാം വയസിലാണ് അദ്ദേഹം ലോകത്തോടു വിടപറയുന്നത്. ജനകീയ നേതാവിന്റെ ഒന്നാം ചരമ വാർഷികം വിപുലമായ പരിപാടികളോടെയാണ് സംസ്ഥാനമാകെ ആചരിക്കുന്നത്. ഇന്ന് പുതുപ്പള്ളിയിൽ ഉമ്മൻ ചാണ്ടി ഫൗണ്ടേഷന്റെ ആഭിമുഖ്യത്തിൽ നടക്കുന്ന അനുസ്മരണം ഗവർണർ ആരിഫ് മുഹമ്മദ് ഖാൻ ഉദ്ഘാടനം ചെയ്യും. സമ്മേളനത്തിൽ പ്രതിപക്ഷ നേതാവ് വി.ഡി സതീശൻ അടക്കുള്ളവർ സംബന്ധിക്കും. നിർധനരായ കുട്ടികൾക്ക് വിദ്യാഭ്യാസ സ്‌കോളർഷിപ്പ് വിതരണം ചെയ്തും ഭവനരഹിതർക്ക് വീടുവച്ചു നൽകിയും മറ്റുമാണ് ഫൗണ്ടേഷന്റെ പ്രവർത്തനങ്ങൾ എന്ന് മകൻ ചാണ്ടി ഉമ്മൻ എം.എൽ.എ. അറിയിച്ചു.