ന്യൂഡല്‍ഹി: ഇന്ത്യ-ബംഗ്ലാദേശ് ക്രിക്കറ്റ് പരമ്പര റദ്ദാക്കണമെന്ന് ഭീഷണി ഉയര്‍ത്തി ഹിന്ദുത്വ സംഘടനകള്‍. ഹിന്ദു ജനജാഗ്രതി സമിതിയും, മാനവസേവ പ്രതിഷ്ഠാനുമാണ് ഭീഷണിയുമായി രംഗത്തെത്തിയത്. പരമ്പര നിരോധിക്കണമെന്ന് ആവശ്യപ്പെട്ട് ബി.സി.സി.ഐ.ക്കും, കേന്ദ്ര സര്‍ക്കാരിനും ഇവര്‍ കത്തയച്ചു. 

ബംഗ്ലാദേശില്‍ ഹിന്ദുക്കള്‍ക്കെതിരെ ആക്രമണം നടക്കുമ്പോള്‍ മത്സരവുമായി മുന്നോട്ട് പോകുന്നത് അനുവദിക്കാനാവില്ല. ഹിന്ദുക്കളുടെ മുറിവില്‍ എരിവ് പുരട്ടുന്ന നടപടിയില്‍ നിന്ന് പിന്‍മാറണമെന്നും കത്തിലുണ്ട്. 

ഹിന്ദു ജനജാഗ്രതി സമിതി നേതാവ് അഡ്വ. അനീഷ് പരാല്‍ക്കര്‍, മാനവസേവ പ്രതിഷ്ഠാന്‍ നേതാവ് വിനായക് ഷിന്‍ഡെ, അഡ്വ രാഹുല്‍ പട്കര്‍, രവീന്ദ്ര ദസരി, സന്ദീപ് തുല്‍സാകര്‍ എന്നിവരാണ് ബി.സി.സി.ഐ പ്രതിനിധിയെ കണ്ടത്. പ്രധാനമന്ത്രി നരേന്ദ്രമോദി, കേന്ദ്ര കായികമന്ത്രി ഡോ മന്‍സൂഖ് മാണ്ഡവ്യ, വിദേശകാര്യമന്ത്രി എസ്. ജയശങ്കര്‍ എന്നിവര്‍ക്കും ഇവര്‍ കത്ത് നല്‍കിയിട്ടുണ്ട്. 

അതേസമയം ഈ മാസം 19ന് ആരംഭിക്കുന്ന ബംഗ്ലാദേശ് പര്യടനത്തില്‍ രണ്ട് ടെസ്റ്റും, മൂന്ന് ടിട്വന്റി മത്സരങ്ങളുമാണ് നടക്കുക. സെപ്റ്റംബര്‍ 19ന് ചെന്നൈയിലാണ് ആദ്യ ടെസ്റ്റ്. രണ്ടാം ടെസ്റ്റ് 27ന് കാണ്‍പൂരിലും നടക്കും. ഒക്ടോബര്‍ 6ന് ഗ്വാളിയോറിലും, ഒന്‍പതിന് ഡല്‍ഹിയിലും, 12ന് ഹൈദരാബാദിലുമാണ് ടിട്വന്റി മത്സരങ്ങള്‍. ഈ രണ്ട് പരമ്പരയും റദ്ദാക്കണമെന്നാണ് ഹിന്ദുത്വ സംഘടനകളുടെ ആവശ്യം. 

India-Bangladesh cricket series should be cancelled Hindutva organizations raised threats A letter was sent to the BCCI and the Prime Minister