ന്യൂഡല്‍ഹി: കെ റെയിലുമായി മുന്നോട്ടു പോകാന്‍ സന്നദ്ധത കാണിച്ച് കേന്ദ്രം. സാങ്കേതിക പ്രശ്‌നങ്ങള്‍ പരിഹരിച്ചാല്‍ പദ്ധതി നടപ്പിലാക്കാന്‍ തയ്യാറാണെന്ന് റെയില്‍വേ മന്ത്രി അശ്വിനി വൈഷ്ണവ് അറിയിച്ചു. തൃശൂര്‍ റെയില്‍വേ സ്റ്റേഷനില്‍ സംസാരിക്കുകക്കവെയായിരുന്നു അദ്ദേഹത്തിന്റെ പ്രതികരണം.

'മുഖ്യമന്ത്രി പിണറായി വിജയനുമായി ഡല്‍ഹില്‍വെച്ച് കൂടിക്കാഴ്ച നടത്തിയിരുന്നു. കെ റെയില്‍ നടപ്പാക്കുന്നതില്‍ സാങ്കേതികവും പാരിസ്ഥിതികവുമായ ചില തടസ്സങ്ങളുണ്ട്. അവ പരിഹരിച്ചാല്‍ പദ്ധതി നടപ്പാക്കാന്‍ റെയില്‍വേ സന്നദ്ധമാണ്' അശ്വിനി വൈഷ്ണവ് പറഞ്ഞു. 

കെ റെയില്‍ പദ്ധതി ഉപേക്ഷിച്ചിട്ടില്ലെന്ന് സംസ്ഥാന സര്‍ക്കാര്‍ ആവര്‍ത്തിച്ച് വ്യക്തമാക്കിയിരുന്നു. കേന്ദ്രസര്‍ക്കാറാണ് പദ്ധതിക്ക് തടസമെന്നും സംസ്ഥാന സര്‍ക്കാര്‍ ആരോപിച്ചിരുന്നു. ഇതിനിടെയാണ് പദ്ധതിയെ പിന്തുണച്ച് കേന്ദ്ര റെയില്‍വേ മന്ത്രി തന്നെ രംഗത്തെത്തുന്നത്. നേരത്തെ കെറെയിലിനെ അനുകൂലിക്കുന്ന നിലപാടല്ല കേന്ദ്രസര്‍ക്കാര്‍ സ്വീകരിച്ചിരുന്നത്.