മുംബൈ: ഒടുവില്‍ മഹാരാഷ്ട്രയില്‍ മുഖ്യമന്ത്രി ആരെന്ന് തീരുമാനമായി. ബി.ജെ.പി.യും ശിവസേനയും തമ്മിലുള്ള അധികാരം പങ്കിടല്‍ തര്‍ക്കം നിരവധി ചര്‍ച്ചകള്‍ക്കൊടുവില്‍ സമവായത്തിലെത്തി.ബി.ജെ.പിയുടെ ദേവേന്ദ്ര ഫഡ്‌നാവിസിനെ മുഖ്യമന്ത്രിയാക്കാന്‍ മഹായുതിക്കുള്ളില്‍ തീരുമാനമായി. നാളെ നടക്കുന്ന ചടങ്ങില്‍ ഫഡ്‌നാവിസ് സത്യപ്രതിജ്ഞ ചെയ്യുമെന്ന് ബി.ജെ.പി വൃത്തങ്ങള്‍ അറിയിച്ചു. ബി.ജെ.പി കോര്‍ കമ്മിറ്റി യോഗത്തിലാണ് അദ്ദേഹത്തിന്റെ പേര് അന്തിമമായി പ്രഖ്യാപിച്ചതെന്ന് വൃത്തങ്ങള്‍ വ്യക്തമാക്കി. 

മഹായുതി സര്‍ക്കാറില്‍ ഉപമുഖ്യമന്ത്രിയാകാന്‍ കാവല്‍ മുഖ്യമന്ത്രിയും ശിവസേന നേതാവുമായ ഏക്‌നാഥ് ഷിന്‍ഡെ സമ്മതമറിയിച്ചു. ബി.ജെ.പി നേതാവും മുന്‍ മുഖ്യമന്ത്രിയുമായ ദേവേന്ദ്ര ഫഡ്‌നാവിസ് ഇന്നലെ വൈകീട്ട് ഷിന്‍ഡെയുമായി കൂടിക്കാഴ്ച നടത്തിയിരുന്നു. ഇതേത്തുടര്‍ന്നാണ് ഷിന്‍ഡെയുടെ കടുത്ത നിലപാടില്‍ അയവ് വന്നതെന്നാണ് റിപ്പോര്‍ട്ട്. എന്‍.സി.പിയുടെ അജിത് പവാറും ഉപമുഖ്യമന്ത്രിയാവും. 

മുഖ്യമന്ത്രിസ്ഥാനം ഫഡ്‌നാവിസ് ഉറപ്പിച്ചെങ്കിലും ബി.ജെ.പി കേന്ദ്രനേതൃത്വം ഇപ്പോഴും പ്രഖ്യാപനം നടത്തിയിട്ടില്ല. കേന്ദ്ര ആഭ്യന്തര മന്ത്രി അമിത് ഷായുമായുള്ള കൂടിക്കാഴ്ചക്കായി ഡല്‍ഹിയിലെത്തി ആറ് ദിവസത്തിന് ശേഷമാണ് ഫഡ്‌നാവിസും ഷിന്‍ഡെയും തമ്മിലുള്ള ആശയവിനിമയം നടന്നത്. 

നവംബര്‍ 23നാണ് സംസ്ഥാനത്തെ തെരഞ്ഞെടുപ്പ് ഫലം പ്രഖ്യാപിച്ചത്. 288 അംഗ സഭയിലെ 230 സീറ്റും നേടിയാണ് മഹായുതി സഖ്യം ഭരണം നിലനിര്‍ത്തിയത്. 132 സീറ്റ് നേടിയ ബി.ജെ.പി!യാണ് ഏറ്റവും വലിയ ഒറ്റക്കക്ഷി. ശിവസേന 57ഉം എന്‍.സി.പി 41 സീറ്റും നേടി.