വിജയ് ഹസാരെ ട്രോഫിയിലെ മികച്ച പ്രകടനത്തിനിടയിലും ചാംപ്യൻസ് ട്രോഫി ഏകദിന ക്രിക്കറ്റ് ടൂർണമെന്റിനുള്ള ഇന്ത്യൻ ടീമിലേക്ക് കരുൺ നായരെ പരി​ഗണിച്ചേക്കില്ലെന്ന് മുൻ ഇന്ത്യൻ താരം ദിനേശ് കാർത്തിക്. വിജയ് ഹസാരെ ട്രോഫിയില്‍ കരുണിന്റെ പ്രകടനം അവിശ്വസനീയമായിരുന്നു. അതിനാൽ തന്നെ ചാംപ്യൻസ് ട്രോഫിക്കുള്ള ഇന്ത്യൻ ടീമില്‍ കരുൺ സ്ഥാനം അര്‍ഹിക്കുന്നുണ്ട്. അതേസമയം നിലവിലെ സാഹചര്യത്തില്‍ കരുൺ ഇന്ത്യൻ ടീമിലെത്താനുള്ള സാധ്യത വളരെ കുറവാണെന്നും ദിനേശ് കാർത്തിക് പറയുന്നു.

നിലവിൽ ഇന്ത്യയുടെ ഏകദിന ടീമിൽ വലിയ മാറ്റങ്ങൾക്ക് സാധ്യതയില്ല. കരുണ്‍ നായരെ കൂടാതെ മായങ്ക് അഗര്‍വാളും വിജയ് ഹസാരെ ട്രോഫിയിൽ മികച്ച പ്രകടനം നടത്തിയ  താരമാണ്. ഇപ്പോഴത്തെ മികച്ച പ്രകടനം തുടർന്നാൽ അധികം വൈകാതെ തന്നെ കരുണിന് ഇന്ത്യൻ ടീമിൽ തിരിച്ചെത്താൻ കഴിയുമെന്നും ദിനേശ് കാര്‍ത്തിക് പറഞ്ഞു.

വിജയ് ഹസാരെ ട്രോഫിയിലെ ഏഴ് ഇന്നിങ്സുകളിലായി അഞ്ച് സെഞ്ച്വറികളടക്കം 752 റണ്‍സാണ് കരുൺ നായർ അടിച്ചുകൂട്ടിയത്. ടൂർണമെന്റിൽ ഒരേയൊരു തവണ മാത്രമാണ് എതിരാളികൾക്ക് താരത്തെ പുറത്താക്കാൻ കഴിഞ്ഞത്. വിദർഭ ടീമിന്റെ നായകനായ കരുണിന് തന്റെ ടീമിനെ ഫൈനലിലെത്തിക്കാനും സാധിച്ചിരുന്നു. നാളെ ഉച്ചയ്ക്ക് 1.30ന് നടക്കുന്ന ഫൈനലിൽ കർണാടകയാണ് വിദർഭയുടെ എതിരാളികൾ.

Indian cricketer Dinesh Karthik shares his thoughts on team selection, stating that even an outstanding performance may not guarantee a spot in the Champions Trophy team.