റിയാദ്: 21 വയസ്സിന് താഴെയുള്ള വീട്ടുജോലിക്കാരെ ജോലിക്കെടുക്കരുതെന്ന മുന്നറിയിപ്പുകൾ പുതുക്കി സഊദി. രാജ്യത്തെ വീട്ടുജോലിക്കാരുടെ സേവനങ്ങളുടെ ഔദ്യോഗിക പ്ലാറ്റ്ഫോമായ മുസാനെദ് ആണ് മുന്നറിയിപ്പുകൾ നൽകിയത്. ഇത് ലംഘിക്കുന്നവർ ശിക്ഷാനടപടികൾക്ക് വിധേയരാകുമെന്നും പോർട്ടലിലൂടെ വ്യക്തമാക്കുന്നു. പുണ്യമാസമായ റമസാൻ അടുത്തെത്തിയതോടെ വീട്ടുജോലിക്കാരുടെ ആവശ്യം വർധിച്ചതിനെ തുടർന്നാണ് മുസാനെദ് മുന്നറിയിപ്പുകൾ നൽകിയത്.

വീട്ടുജോലിക്കാർക്ക് വേതനത്തോടുകൂടെ ആഴ്ചതോറും ഒരു ദിവസത്തിൽ കുറയാത്ത വിശ്രമദിന അവധിക്ക് അർഹതയുണ്ടെന്നും മുസാനദ് വ്യക്തമാക്കുന്നു. അതേസമയം, വിശ്രമദിന അവധിയിൽ ജോലി ചെയ്യുന്ന സാഹചര്യത്തിൽ പകരം ദിവസ അവധിയോ സാമ്പത്തിക അലവൻസിനോ തൊഴിലാളിക്ക് അവകാശമുണ്ടായിരിക്കും. കൂടാതെ, രണ്ട് വർഷത്തെ കരാർ പൂർത്തിയാക്കി മടങ്ങുന്ന തൊഴിലാളികൾക്ക് സ്വദേശത്തേക്കുളള വിമാനടിക്കറ്റ് ലഭിക്കാനും അർഹതയുണ്ട്. രണ്ടുവർഷത്തിനു ശേഷം കരാർപുതുക്കി അവധിക്ക് നാട്ടിലേക്ക് പോയി മടങ്ങുന്നതിനുള്ള വിമാന ടിക്കറ്റും തൊഴിലുടമ നൽകണമെന്ന് നിയമത്തിൽ വ്യവസ്ഥ ചെയ്തിട്ടുണ്ട്.

ഗാർഹികജോലിക്കാർക്കും സമാനമായ തസ്‌തികകളിലുള്ളവർക്കും വേണ്ടിയുള്ള ചട്ടങ്ങളിൽ നിഷ്‌കർഷിച്ചിരിക്കുന്ന കാര്യങ്ങൾക്ക് അനുസൃതമായി, വീട്ടുജോലിക്കാർക്കുള്ള ട്രയൽ കാലയളവിനുള്ള വ്യവസ്‌ഥകളും മുസാനെദ് പ്ലാറ്റ്ഫോം നിശ്ചയിച്ചിട്ടുണ്ട്. വീട്ടുജോലിക്കാരുടെ പ്രൊബേഷൻ കാലയളവിനുള്ള വ്യവസ്‌ഥകൾ ആർട്ടിക്കിൾ ഒൻപത് പ്രകാരം വ്യവസ്‌ഥ ചെയ്യുന്നു. വീട്ടുടമയായ തൊഴിൽദാതാവിന് 90 ദിവസത്തിൽ കൂടാത്ത കാലയളവിലേക്ക് വീട്ടുജോലിക്കാരന്റെ പ്രഫഷനൽ കഴിവും അയാളുടെ വ്യക്‌തിപരമായ പെരുമാറ്റത്തിന്റെ സമഗ്രതയും പരിശോധിക്കാവുന്നതാണ്.

അതേസമയം, തൊഴിലാളിയുടെ അസുഖം 30 ദിവസത്തിലേറെയായാൽ തൊഴിലുടമക്ക് തൊഴിൽ കരാർ അവസാനിപ്പിക്കാനുള്ള അവകാശമുണ്ട്. കൂടാതെ, പ്രൊബേഷൻ കാലയളവിൽ വീട്ടുജോലിക്കാരൻ്റെ കരാർ ഏകപക്ഷീയമായി സ്വമനസ്സാൽ അവസാനിപ്പിക്കാൻ ഇരു കക്ഷികൾക്കും അവകാശമുണ്ടെന്നും വ്യവസ്‌ഥകളിൽ പറയുന്നു. വീട്ടുജോലിക്കാരി തൻ്റെ ആദ്യ ജോലിയിൽ നിന്ന് വ്യത്യസ്തമായ മറ്റൊരു ജോലി ചെയ്യുന്നതിന് ബന്ധത്തിലെ രണ്ട് കക്ഷികളും സമ്മതിക്കുന്നില്ലെങ്കിൽ ഒരേ വീട്ടുജോലിക്കാരിയെ ഒന്നിലധികം തവണ പ്രൊബേഷനിൽ ആക്കുന്നതും അനുവദനീയമല്ല.

ഒരു പ്രത്യേക കാലയളവിലേക്കായിരിക്കണം വീട്ടുജോലി കരാർ, അതിൽ കാലാവധി വ്യക്തമാക്കിയിട്ടില്ലെങ്കിൽ, അത് അവസാനിച്ചതായി കണക്കാക്കുകയും ജോലി ആരംഭിച്ച തീയതി മുതൽ ഒരു വർഷത്തേക്ക് പുതുക്കാവുന്നതുമാണെന്നും മുസാനെദ് പ്ലാറ്റ്ഫോം വ്യക്തമാക്കിയിട്ടുണ്ട്. 800 മുതൽ 1500 റിയാൽ വരെ ശമ്പളത്തിൽ 3.5 ദശലക്ഷം തൊഴിലാളികളാണ് സഊദിയിൽ ഈ മേഖലയിൽ ജോലി ചെയ്യുന്നത്.

Saudi Arabia has updated its warnings for domestic workers, aiming to provide better protection for this group