ഒമാനിലെ സ്വകാര്യ ആരോഗ്യ സ്ഥാപനങ്ങളില്‍ വിസ മെഡിക്കല്‍ സേവനങ്ങള്‍ പകല്‍ സമയത്ത് മാത്രമായി പരിമിതപ്പെടുത്തി. കൂടാതെ, വിസ മെഡിക്കലിനായി രക്ത സാമ്പിളുകള്‍ ശേഖരിക്കാനുള്ള സമയവും അരോഗ്യ മന്ത്രാലയം പുനക്രമീകരിച്ചു. പുതിയ സര്‍ക്കുലര്‍ അനുസരിച്ച് രാവിലെ ഏഴര മുതല്‍ വൈകുന്നേരം അഞ്ച് മണി വരെയാണ് ഇനി സാമ്പിള്‍ ശേഖരിക്കാനുള്ള സമയം.

ലബോറട്ടറി പരിശോധനക്കായി ആരോഗ്യ മന്ത്രാലയത്തില്‍ സാമ്പിളുകള്‍ അയക്കാനുള്ള സമയം രാവിലെ ഏഴരക്കും പത്ത് മണിക്കും ഇടയിലായിരിക്കും. ആരോഗ്യമന്ത്രാലയത്തിന്റെ നിര്‍ദേശം ഈ മാസം പത്ത് മുതല്‍ നിലവില്‍ വന്നു. വിസ മെഡിക്കല്‍ സ്ഥാപനങ്ങളിലും ആരോഗ്യ സ്ഥാപനങ്ങളിലും വിസ മെഡിക്കലിന് ആവശ്യമായ രക്ത സാമ്പിളുകള്‍ നേരത്തെ രാത്രി വൈകിയും ശേഖരിച്ചിരുന്നു. കൂടാതെ, സി ഡി സിയില്‍ ലബോറട്ടറി പരിശോധനക്ക് നല്‍കുന്നതിനും കൂടുതല്‍ സമയം അനുവദിച്ചിരുന്നു.

പുതിയ നടപടിക്രമങ്ങളില്‍ വീഴ്ച വരുത്തിയാല്‍ നിയമലംഘനമായി കണക്കാക്കുകയും സ്ഥാപനം നടപടികള്‍ നേരിടേണ്ടതായി വരുമെന്നും ആരോഗ്യ മന്ത്രാലയം മുന്നറിയിപ്പ് നല്‍കി. 

എന്നാല്‍ വിസ മെഡിക്കല്‍ സമയം കുറച്ചത് പ്രവാസികള്‍ക്ക് തിരിച്ചടിയാണ്. മുന്‍പ് ജോലി സമയം കഴിഞ്ഞ് രാത്രി വൈകിയും വിസ മെഡിക്കലിന് രക്ത സാമ്പിളുകള്‍ നല്‍കാമായിരുന്നെങ്കില്‍, പുതിയ ഉത്തരവനുസരിച്ച് പകല്‍ സമയത്ത് ജോലിക്കിടയില്‍ തന്നെ വിസ മെഡിക്കല്‍ കേന്ദ്രങ്ങളിലെത്തേണ്ടിവരും.

Oman's Health Ministry has announced that visa medical services will now be available only during daytime hours, streamlining the process for applicants.